ದುಬೈ: ವರನೊಬ್ಬ ಮದುವೆಯಾಗಿ 15 ನಿಮಿಷಕ್ಕೆ ತನ್ನ ಪತ್ನಿಗೆ ವಿಚ್ಛೇದನ ನೀಡಿದ್ದಾನೆ. ವಧುವಿನ ತಂದೆ ಹಣಕ್ಕಾಗಿ ಅವಸರ ಮಾಡಿದ ಹಿನ್ನೆಲೆಯಲ್ಲಿ ಸಿಟ್ಟಾಗಿ ವರ 15 ನಿಮಿಷಕ್ಕೆ ವಿಚ್ಛೇದನ ನೀಡಿದ್ದಾನೆ.
ಇಸ್ಲಾಂ ಧರ್ಮದಲ್ಲಿ ವರ ಹಾಗೂ ವಧು ಒಂದು ಕಾಂಟ್ರ್ಯಾಕ್ಟ್ ಸಹಿ ಮಾಡಬೇಕಾಗುತ್ತದೆ. ಈ ಪ್ರಕಾರ ನಿರ್ಧಿಷ್ಟ ಮೊತ್ತವನ್ನು ನೀಡುವುದಾಗಿ ವರ ತನ್ನ ಮಾವನಿಗೆ ತಿಳಿಸಿದ್ದ. ಆದರೆ ಈ ಮದುವೆಯಲ್ಲಿ ಮಾವ ಒಪ್ಪಂದ ಮಾಡಿಕೊಂಡಿದ್ದ ಹಣವನ್ನು ಈಗಲೇ ನೀಡಬೇಕೆಂದು ಹೇಳಿದ ಹಿನ್ನೆಲೆಯಲ್ಲಿ ಈಗ ಮದುವೆ ಮುರಿದು ಬಿದ್ದಿದೆ.
ಏನಿದು ಪ್ರಕರಣ?
ವರ ವಧುವಿನ ತಂದೆಗೆ 1 ಲಕ್ಷ ದಿರ್ಹಾಮ್(ಅಂದಾಜು 18.58 ಲಕ್ಷ ರೂ.) ನೀಡುತ್ತೇನೆ ಎಂದು ಒಪ್ಪಿಕೊಂಡಿದ್ದನು. ಹಣ ಪಡೆಯಲು ವಧುವಿನ ತಂದೆ ಅವಸರ ಮಾಡಿದ್ದಕ್ಕೆ ವರ ತನ್ನ ಪತ್ನಿಗೆ ವಿಚ್ಛೇದನ ನೀಡಿದ್ದಾನೆ.
ಮದುವೆ ನಡೆಯುವ ಮುಂಚೆ ವರ ವಧುವಿನ ತಂದೆಗೆ ಅರ್ಧ ಹಣವನ್ನು ನೀಡಿದ್ದನು. ನಂತರ ಉಳಿದ ಅರ್ಧ ಹಣವನ್ನು ಮದುವೆಯ ನಂತರ ಮದುವೆ ಮನೆಯಲ್ಲೇ ಕೊಡುವುದಾಗಿ ಹೇಳಿದ್ದ. ದಂಪತಿ ಒಪ್ಪಂದಕ್ಕೆ ಸಹಿ ಮಾಡುತ್ತಿದ್ದಂತೆ ವಧುವಿನ ತಂದೆ ವರ ಕೊಡಬೇಕಾದ ಉಳಿದ ಹಣಕ್ಕೆ ಬೇಡಿಕೆ ಇಟ್ಟಿದ್ದಾನೆ. ಆಗ ವರ ಕಾರಿನಲ್ಲಿ ಉಳಿದ ಹಣವಿದೆ 5 ನಿಮಿಷದಲ್ಲಿ ನೀಡುತ್ತೇನೆ ಎಂದು ಮಾವನಿಗೆ ಹೇಳಿದ್ದಾನೆ.
ಆದರೆ ವಧುವಿನ ತಂದೆ ವರನ ಮಾತನ್ನು ಒಪ್ಪಲಿಲ್ಲ. ಈಗಲೇ ಹಣವನ್ನು ತಂದುಕೊಡು ಎಂದು ಹಠ ಮಾಡಿದ್ದಾನೆ. ಈಗಲೇ ಹಣ ಕೊಡು ಇಲ್ಲವೆಂದರೆ ಹಣ ತರಲು ನಿನ್ನ ಸ್ನೇಹಿತನಿಗೆ ಕಳುಹಿಸು ಎಂದು ವಧುವಿನ ತಂದೆ ಮದುವೆ ಮನೆಯಲ್ಲೇ ಹೈಡ್ರಾಮಾ ನಡೆಸಿದ್ದಾನೆ. ವಧುವಿನ ತಂದೆಯ ಈ ವರ್ತನೆಯಿಂದ ವರನಿಗೆ ಅವಮಾನವಾಗಿ ತಕ್ಷಣ ತನ್ನ ಮದುವೆಯನ್ನು ಮುರಿಯುತ್ತೇನೆ ಎಂದು ಹೇಳಿದ್ದಾನೆ. ಅಷ್ಟೇ ಅಲ್ಲದೇ ಪತ್ನಿಗೆ ವಿಚ್ಛೇದನ ನೀಡಿದ್ದೇನೆ ಎಂದು ವಕೀಲರು ತಿಳಿಸಿದ್ದಾರೆ.
ನನಗೆ ನಿಮ್ಮ ಮಗಳು, ನನ್ನ ಪತ್ನಿ ಬೇಕಾಗಿಲ್ಲ. ನಾನು ಈಗಲೇ ನಿಮ್ಮ ಮಗಳಿಗೆ ವಿಚ್ಛೇದನ ನೀಡುತ್ತೇನೆ. ಒಪ್ಪಂದಕ್ಕೆ ಸಹಿ ಮಾಡಿ 15 ನಿಮಿಷದೊಳಗೆ ನಾನು ನನ್ನ ಪತ್ನಿಗೆ ವಿಚ್ಛೇದನ ನೀಡಿದ್ದೇನೆ ಎಂದು ವರ ತಿಳಿಸಿದ್ದಾನೆ ಎಂದು ವರದಿಯಾಗಿದೆ.
