ಬಳ್ಳಾರಿ: ಕುರಿಗಾಯಿ ಹನುಮಂತನ ಹಾಡು ಯಾರಿಗೆ ಇಷ್ಟ ಇಲ್ಲ ಹೇಳಿ. ಹನುಮಂತ ಹಾಡುತ್ತಿದ್ದರೆ ಎಲ್ಲರೂ ತೆಲೆದೂಗಿಸ್ತಾರೆ. ಆದರೆ ಬಳ್ಳಾರಿಯಲ್ಲಿ ಮಾತ್ರ ಹನುಮಂತನ ಹಾಡಿಗೆ ನೂರಾರು ಹುಡುಗಿಯರು ಹುಚ್ಚೆದ್ದು ಕುಣಿದಿದ್ದಾರೆ.
ಬಳ್ಳಾರಿಯ ಆರ್ ವೈಎಂಇಸಿ ಕಾಲೇಜಿನ ವಾರ್ಷಿಕ ಸಮಾರಂಭದ ಮಂದಾರ ಕಾರ್ಯಕ್ರಮದಲ್ಲಿ ಹನುಮಂತ ಹಾಡಿದ ಹಾಡಿಗೆ ಸಾವಿರಾರು ವಿದ್ಯಾರ್ಥಿಗಳು ಕುಣಿದು ಕುಪ್ಪಳಿಸಿದರು. ಹನುಮಂತನ ಕೇಳೋ ಜಾಣ, ಚುಟು ಚುಟು ಅಂತೈತಿ ಹಾಗೂ ಲಂಬಾಣಿ ಹಾಡು ಹಾಡುತ್ತಿದ್ದಂತೆಯೇ ನೆರೆದಿದ್ದ ಸಾವಿರಾರು ವಿದ್ಯಾರ್ಥಿಗಳು ಹಾಡಿನೊಂದಿಗೆ ಹೆಜ್ಜೆ ಹಾಕಿದ್ದಾರೆ.
ಹನುಮಂತನ ಜೊತೆ ಸಂಚಿತ್ ಹೆಗ್ಡೆ, ಚನ್ನಪ್ಪ ಹಾಗೂ ಸುಪ್ರಿತ ಸೇರಿದಂತೆ ಖಾಸಗಿ ವಾಹಿನಿಯಲ್ಲಿ ಪ್ರಸಾರವಾಗುವ ಕನ್ನಡದ ಸರಿಗಮಪದ ವಿಶೇಷ ಗಾಯಕರು ಸುಮಾರು 2 ಗಂಟೆಗಳ ಕಾಲ ಹಾಡಿ ಪೇಕ್ಷಕರನ್ನ ರಂಜಿಸಿದರು. ಈ ವೇಳೆ ಹನುಮಂತನ ಜೊತೆ ಸೆಲ್ಫಿ ತೆಗೆಸಿಕೊಳ್ಳಲು ಹುಡುಗಿಯರು, ಯುವಕರು ಹಾಗೂ ಪೇಕ್ಷಕರು ಮುಗಿಬಿದ್ದ ಪ್ರಸಂಗ ಕೂಡ ನಡೆಯಿತು.
