ಬೆಂಗಳೂರು: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ (Kempegowda International Airport) ನಮ್ಮ ವಿಮಾನ ನಿಲ್ದಾಣ ನಮ್ಮ ಹೆಮ್ಮೆ ಅನ್ನೋ ಹಾಗೆ ಸದಾ ಸಾಧನೆಯ ಹಾದಿಯಲ್ಲಿ ಸಾಗುತ್ತಿದೆ. ಉದ್ಯಾನನಗರಿ ಬೆಂಗಳೂರಿನ (Bengaluru) ಖ್ಯಾತಿಗೆ ಪ್ರತೀಕವೆಂಬಂತೆ ಸಾವಿರಾರು ಕೋಟಿ ರೂ. ವೆಚ್ಚದಲ್ಲಿ ಉದ್ಯಾನವನ ಮಾದರಿಯ ಹಚ್ಚ ಹಸಿರಿನ ಪರಿಸರ ಸ್ನೇಹಿ ಟರ್ಮಿನಲ್-2 (Terminal 2) ಸಾರ್ವಜನಿಕರ ಸೇವೆಗೆ ಲಭ್ಯವಾಗುತ್ತಿದೆ.
ಹೌದು, ಕಳೆದ ವರ್ಷ ನವೆಂಬರ್ 11 ರಂದು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಲೋಕಾರ್ಪಣೆ ಮಾಡಿದ್ದ ಬೆಂಗಳೂರಿನ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್-2 ಇದೀಗ ಕಾರ್ಯಾರಂಭ ಮಾಡಲು ಸಕಲ ಸನ್ನದ್ಧವಾಗಿದೆ. ಉದ್ಯಾನನಗರಿ ಬೆಂಗಳೂರಿನ ಪ್ರತೀಕವೆಂಬಂತೆ ತಲೆ ಎತ್ತಿರುವ ಪರಿಸರ ಸ್ನೇಹಿ ಟರ್ಮಿನಲ್-2 ಇದೇ ಜನವರಿ 15 ಸಂಕ್ರಾಂತಿ ಹಬ್ಬದ ನಂತರ ಸಾರ್ವಜನಿಕರ ಸೇವೆಗೆ ಲಭ್ಯವಾಗುತ್ತಿದೆ.
ಜನವರಿ 15 ರಂದು ಬೆಳಗ್ಗೆ 8 ಗಂಟೆ 40 ನಿಮಿಷಕ್ಕೆ ಕೆಂಪೇಗೌಡ ಏರ್‌ಪೋರ್ಟ್‌ನ ಟರ್ಮಿನಲ್-2 ರನ್‌ವೇಯಿಂದ ಸ್ಟಾರ್ ಏರ್‌ಲೈನ್ಸ್ ಮೊಟ್ಟ ಮೊದಲ ವಿಮಾನ ಕಲಬುರಗಿಗೆ ಹಾರಲಿದೆ. ಹೀಗಾಗಿ ಟರ್ಮಿನಲ್-2 ಕಡೆಯಿಂದ ಮೊಟ್ಟ ಮೊದಲ ಪ್ರಯಾಣ ಮಾಡಲು ಬಯಸುವ ಹಾಗೂ ಕಲಬುರಗಿಗೆ ಹೋಗಲಿಚ್ಛಿಸುವ ಪ್ರಯಾಣಿಕರು ತಮ್ಮ ಟಿಕೆಟ್ ಅನ್ನು ಬುಕ್ ಮಾಡಿಕೊಳ್ಳಬಹುದಾಗಿದೆ. ಇದನ್ನೂ ಓದಿ: ಚಂಡೀಗಢ ಕೇಸ್‌ನಲ್ಲಿ ಪ್ರತಿಧ್ವನಿಸಿದ ಬೆಂಗಳೂರಿನ ಅವ್ಯವಸ್ಥಿತ ನಗರೀಕರಣ ಯೋಜನೆ
ಈ ಬಗ್ಗೆ ಸ್ವತಃ ಕೆಂಪೇಗೌಡ ಅಂತಾರಾಷ್ಟ್ರೀಯ ಆಡಳಿತ ಮಂಡಳಿ ಸ್ಪಷ್ಟಪಡಿಸಿದೆ. ಟರ್ಮಿನಲ್-2 ಇಂದ ಮೊದಲ ವಿಮಾನ ಕಲಬುರಗಿಗೆ ಹಾರಾಟ ಮಾಡಲಿದ್ದು, ದೇಶಿಯ ವಿಮಾನಗಳ ಹಾರಾಟಕ್ಕೆ ಮಾತ್ರವೇ ಅನುಮತಿ ನೀಡಲಾಗುತ್ತಿದೆ. ಇನ್ನೂ ಹಂತ ಹಂತವಾಗಿ ದೇಶಿಯ ಹಾಗೂ ವಿದೇಶಿ ವಿಮಾನಗಳ ಮೂಲಕ ಹೊರಡುವ ಹಾಗೂ ಬರುವ ಪ್ರಯಾಣಿಕರಿಗೂ ಟರ್ಮಿನಲ್-2 ಸೇವೆ ಒದಗಿಸಲಾಗುವುದು ಎಂದು ತಿಳಿಸಲಾಗಿದೆ.
ಸಾವಿರಾರು ಕೋಟಿ ರೂ. ವೆಚ್ಚದಲ್ಲಿ ಜಾಗತಿಕ ಮಟ್ಟದಲ್ಲಿ ಅತ್ಯುನ್ನತ ಐ ಸ್ಟ್ಯಾಂಡರ್ಡ್ಸ್‌ನಲ್ಲಿ ನಿರ್ಮಾಣ ಮಾಡಲಾಗಿರುವ ಟರ್ಮಿನಲ್-2 ಕಣ್ತುಂಬಿಕೊಳ್ಳುವುದೇ ಒಂದು ರೀತಿಯ ಹಬ್ಬವಿದ್ದಂತೆ. ಹಚ್ಚ ಹಸಿರಿನ ತೂಗುಯ್ಯಾಲೆಯಂತೆ ನೇತಾಡುವ ಹಸಿರಿನ ಸಿರಿ, ಕೃತಕ ಜಲಪಾತ, ಬಿದಿರಿನಿಂದಲೇ ಮೂಡಿ ಬಂದಿರುವ ಮೇಲ್ಚಾವಣಿ ಟರ್ಮಿನಲ್-2ನ ಅಂದವನ್ನು ಮತ್ತಷ್ಟು ಹೆಚ್ಚಿಸಿದೆ. ಟರ್ಮಿನಲ್-2ನ ಎಂಟ್ರಿ ಹೊಸ ಲೋಕಕ್ಕೆ ಹೋದಂತಹ ಅನುಭವ ನೀಡಲಿದ್ದು, ಇದನ್ನು ಕಣ್ತುಂಬಿಕೊಳ್ಳಲು ಸಾಕಷ್ಟು ಜನರು ತುದಿಗಾಲಲ್ಲಿ ಕಾತುರದಿಂದ ಕಾಯುತ್ತಿದ್ದಾರೆ. ಇದೀಗ ಟರ್ಮಿನಲ್-2 ಕಾರ್ಯಾರಂಭಕ್ಕೆ ದಿನಗಣನೆ ಪ್ರಾರಂಭವಾಗಿದೆ. ಇದನ್ನೂ ಓದಿ: ಉತ್ತರ ಕರ್ನಾಟಕದಲ್ಲಿ ಚಳಿ ಮತ್ತಷ್ಟು ಹೆಚ್ಚಳ – ಶೀತ ಮಾರುತಗಳ ಅಲರ್ಟ್
Live Tv
[brid partner=56869869 player=32851 video=960834 autoplay=true]
Join our Whatsapp group by clicking the below link
https://chat.whatsapp.com/E6YVEDajTzH06LOh77r25k
