ಬೀಜಿಂಗ್: ಹೊರಗಡೆಯಿಂದ ಊಟ ಆರ್ಡರ್ ಮಾಡಿದಾಗ ಡೆಲಿವರಿ ಸರಿಯಾದ ಸಮಯಕ್ಕೆ ಬರಲಿಲ್ಲವೆಂದ್ರೆ ತಾಳ್ಮೆ ಕಳೆದುಕೊಳ್ತೀವಿ. ಹಾಗೇ ನಗರದ ಟ್ರಾಫಿಕ್‍ನ ಮಧ್ಯೆಯೂ ಸರಿಯಾದ ಸಮಯಕ್ಕೆ ಡೆಲಿವರಿ ಮಾಡೋದು ಕಷ್ಟದ ಕೆಲಸವೇ. ಇನ್ನು ಬಾಣಸಿಗರು ಅಡುಗೆ ತಯಾರು ಮಾಡೋದಕ್ಕೇ ಹೆಚ್ಚಿನ ಸಮಯ ತೆಗೆದುಕೊಂಡ್ರೆ ಹೇಗಾಗ್ಬೇಡ. ಹೀಗೆ ಗ್ರಾಹಕರೊಬ್ಬರು ಆರ್ಡರ್ ಮಾಡಿದ ಊಟ ತಯಾರಾಗೋಕೆ ಕಾದು ಕಾದು ಸುಸ್ತಾದ ಚೀನಾದ ಡೆಲಿವರಿ ಬಾಯ್ ತಾನೇ ಅಡುಗೆಮನೆಗೆ ಹೋಗಿ ಕೈಲಿ ಸೌಟು ಹಿಡಿದಿದ್ದಾನೆ.
ಅಡುಗೆ ಮನೆಗೆ ಪ್ರವೇಶಿಸಿ ಡೆಲಿವರಿ ಬಾಯ್ ತಾನೇ ಅಡುಗೆ ತಯಾರಿಸಿದ್ದಾನೆ. ಸರಿಯಾದ ಸಮಯಕ್ಕೆ ಊಟ ಡೆಲಿವರಿ ಮಾಡಬೇಕೆಂಬ ಒತ್ತಡವಿದ್ದಿದ್ರಿಂದ ಆತನೇ ಅಡುಗೆ ಮನೆಗೆ ಎಂಟ್ರಿ ಕೊಡಬೇಕಾಯ್ತು ಅಂತ ಇಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ.
ಹಳದಿ ಬಣ್ಣದ ಸಮವಸ್ತ್ರ ಹಾಗೂ ಹಳದಿ ಹೆಲ್ಮೆಟ್ ಧರಿಸಿರೋ ಡೆಲಿವರಿ ಬಾಯ್ ಇತರೆ ಬಾಣಸಿಗರೊಂದಿಗೆ ಅಡುಗೆ ತಯಾರು ಮಾಡ್ತಿರೋದನ್ನ ವಿಡಿಯೋದಲ್ಲಿ ಕಾಣಬಹುದು. ಈ ವಿಡಿಯೋವನ್ನ ಚೀನಾದ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲಾಗಿದೆ.
