ನವದೆಹಲಿ: ಅಪ್ರಾಪ್ತ ಹುಡುಗ ಕಾರು ಓಡಿಸುತ್ತಾ ಆಟೋ ರಿಕ್ಷಾಗೆ ಡಿಕ್ಕಿ ಹೊಡೆದ ಪರಿಣಾಮ ಸ್ಥಳದಲ್ಲಿಯೇ ಆಟೋ ಚಾಲಕ ಮೃತಪಟ್ಟಿರುವ ಘಟನೆ ದೆಹಲಿಯ ಕಸ್ತೂರಬಾ ಗಾಂಧಿ ಮಾರ್ಗದಲ್ಲಿ ನಡೆದಿದೆ.
ಈ ಘಟನೆ ಗುರುವಾರದಂದು ನಡೆದಿದೆ. 17 ವರ್ಷ ವರ್ಷದ ಹುಡುಗ ತನ್ನ ಸ್ನೇಹಿತರ ಜೊತೆಗೂಡಿ ಮಾರುತಿ ಸಿಯಾಝ್ ಕಾರನ್ನು ಚಲಾಯಿಸುತ್ತಿದ್ದನು. ಸ್ನೇಹಿತರು ಕೂಡ ಅಪ್ರಾಪ್ತರಾಗಿದ್ದು, ಇವರೆಲ್ಲರೂ ಕೊನಾಟ್ ಪ್ಲೇಸ್ ಗೆ ಬಂದಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.
ಮಾರುತಿ ಸಿಯಾಝ್ ಕಾರು ಹುಡುಗನ ಚಿಕ್ಕಪ್ಪನಿಗೆ ಸೇರಿದ್ದಾಗಿದ್ದು, ಅಪ್ರಾಪ್ತನಿಗೆ ಕಾರಿನ ಕೀಗಳನ್ನು ಕೊಟ್ಟ ಕಾರಣ ಅವರ ಮೇಲೆ ಪ್ರಕರಣ ದಾಖಲಾಗುವ ಸಾಧ್ಯತೆ ಇದೆ. ಅಪ್ರಾಪ್ತ ಹುಡುಗ ಟ್ರಾಫಿಕ್ ಸಿಗ್ನಲ್ ಜಿಗಿದು ಕೆ.ಜಿ. ಮಾರ್ಗ್ ಮತ್ತು ಟಾಲ್ಸ್ಟಾಯ್ ಮಾರ್ಗದ ತಿರುವಿನಲ್ಲಿ ಆಟೋ-ರಿಕ್ಷಾಗೆ ಡಿಕ್ಕಿ ಹೊಡೆದಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.
ಮಾತಾ ಸುಂದರಿ ರಸ್ತೆಯ ನಿವಾಸಿ ಆಟೋ ಚಾಲಕ ಶಿವಶಂಕರ್ ಮಹಾಟೋ(66) ಕಾರು ಡಿಕ್ಕಿ ಹೊಡೆದ ಪರಿಣಾಮ ಗಾಳಿಯಲ್ಲಿ ಹಲವು ಮೀಟರ್ ಎಸೆಯಲ್ಪಟ್ಟಿದ್ದು, ನಂತರ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಅಪಘಾತದಲ್ಲಿ ಸ್ನೇಹಿತರು ಗಾಯಗೊಂಡಿದ್ದು, ಕಾರು ಚಲಾಯಿಸುತ್ತಿದ್ದವನ ತಲೆಗೆ ಗಂಭೀರವಾಗಿ ಪೆಟ್ಟಾಗಿದೆ. ಅವರನ್ನು ಸಮೀಪದ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖೆ ಮುಂದುವರೆದಿದೆ.
