ಹುಬ್ಬಳ್ಳಿ: ರಾಜ್ಯದಲ್ಲಿ ಮಳೆಗಾಲ ಆರಂಭವಾಗುತ್ತಿದಂತೆ ಸರ್ಕಾರಿ ಬಸ್ಸುಗಳ ಬಣ್ಣ ಬಯಲಾಗಿದ್ದು, ಮಳೆಯಿಂದ ಬಸ್ ಮಳಿಗೆ ಸೋರಿದ ಪರಿಣಾಮ ಚಾಲಕನಿಗೆ ರಕ್ಷಣೆ ನೀಡಲು ಕಂಡಕ್ಟರ್ ಕೊಡೆ ಹಿಡಿದು ನಿಂತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಜಿಲ್ಲೆಯ ವಾಯುವ್ಯ ಕರ್ನಾಟಕ ಸಾರಿಗೆ ಸಂಸ್ಥೆಗೆ ಸೇರಿದ ಬಸ್ ಇದಾಗಿದ್ದು, ಮಳೆಯಿಂದ ಚಾಲಕನ ತಲೆ ಮೇಲ್ಭಾಗದಲ್ಲೇ ಸೋರಲು ಆರಂಭಿಸಿತ್ತು. ಈ ವೇಳೆ ಬಸ್‍ನ ಕಂಡಕ್ಟರ್ ಡ್ರೈವರ್ ಗೆ ಬಸ್ ನಲ್ಲಿ ಕೊಡೆ ಹಿಡಿದಿದ್ದರು. ಈ ವಿಡಿಯೋ ಮಾಡಿರುವ ಸಾರ್ವಜನಿಕರು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟಿದ್ದಾರೆ.
ಅಂದಹಾಗೇ ಈ ಘಟನೆ ಹುಬ್ಬಳ್ಳಿ ತಾಲೂಕಿನ ಅಲ್ಲಾಪುರ ಗ್ರಾಮ ಮಾರ್ಗವಾಗಿ ಚಲಿಸುವ ಬಸ್ ನಲ್ಲಿ ನಡೆದಿದೆ. ಹುಬ್ಬಳ್ಳಿ ಗ್ರಾಮೀಣ ಬಸ್ ಡಿಪೋಗೆ ಸೇರಿದ ಬಸ್ ಇದಾಗಿದ್ದು, ಈ ಹಿಂದೆಯೂ ಹುಬ್ಬಳ್ಳಿ-ಧಾರವಾಡ ಮಧ್ಯೆ ಸಂಚರಿಸೋ ಬಸ್ ನಲ್ಲಿ ಕೊಡೆ ಹಿಡಿದು ಪ್ರಯಾಣ ಬೆಳೆಸಿದ್ದರು. ಮಳೆಯ ಹಿನ್ನೆಲೆ ಬಸ್ ಸೋರುತ್ತಿದ್ದ ಹಿನ್ನೆಲೆ ಆಕ್ರೋಶ ವ್ಯಕ್ತವಾಗಿತ್ತು. ಈಗ ಮತ್ತೆ ಅದೇ ರೀತಿಯಲ್ಲಿ ಬಸ್ ನಲ್ಲಿ ಕೊಡೆ ಹಿಡಿದು ಚಾಲನೆ ಮಾಡಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಸರ್ಕಾರಿ ಬಸ್ ಅವ್ಯವಸ್ಥೆಯನ್ನು ಸಾರಿ ಹೇಳುವಂತಿದೆ.
