ಬೆಂಗಳೂರು: ಮಹಿಳಾ ಪಿಎಸ್‍ಐಗೆ ತಡರಾತ್ರಿ ಕರೆ ಮಾಡಿ ಅಶ್ಲೀಲ ಪದಗಳಿಂದ ನಿಂದಿಸಿ ಅನುಚಿತವಾಗಿ ವರ್ತಿಸುತ್ತಿದ್ದ ವ್ಯಕ್ತಿಯನ್ನು ಬೆಂಗಳೂರಿನ ವಿದ್ಯಾರಣ್ಯಪುರ ಪೊಲೀಸರು ಬಂಧಿಸಿದ್ದಾರೆ.
ಮಂಜುನಾಥ ಅಲಿಯಾಸ್ ಚೂಲ್ ರಾಮ ಬಂಧಿತ ಆರೋಪಿ. ಬಂಧಿತ ಆರೋಪಿಯನ್ನು ವಿಚಾರಣೆ ನಡೆಸಿದ ಪೊಲೀಸರಿಗೆ ಶಾಕ್ ಕಾದಿತ್ತು. ಯಾಕೆಂದರೆ ಆರೋಪಿ ಮಂಜುನಾಥನ ಪ್ರಿಯತಮೆ ಪುಟ್ಟಮ್ಮ ಎನ್ನುವರು ವಿದ್ಯಾರಣ್ಯಪುರ ಪೊಲೀಸ್ ಠಾಣೆಯಲ್ಲಿ ಹೋಮ್ ಗಾರ್ಡ್ ಆಗಿ ಕೆಲಸ ಮಾಡುತ್ತಿದ್ದಳು.
ಹೋಮ್ ಗಾರ್ಡ್ ಪುಟ್ಟಮ್ಮನಿಗೆ ಇನ್ ಚಾರ್ಜ್ ಆಗಿದ್ದ ಲೇಡಿ ಪಿಎಸ್‍ಐ ಪುಟ್ಟಮ್ಮನಿಗೆ ಓವರ್ ಡ್ಯೂಟಿ ಹಾಕಿ ಕಿರುಕುಳ ಕೊಡುತ್ತಿದ್ದರು. ಈ ವಿಚಾರವನ್ನು ಹೋಮ್ ಗಾರ್ಡ್ ಪ್ರಿಯಕರ ಮಂಜುನಾಥನ ಬಳಿ ಹೇಳಿಕೊಂಡಿದ್ದಳು. ಇದರಿಂದ ಕೋಪ ಗೊಂಡ ಆರೋಪಿ ಮಂಜುನಾಥ ಪಿಎಸ್‍ಐ ನಂಬರ್ ಪಡೆದು, ತಡರಾತ್ರಿ ಫೋನ್ ಮಾಡಿ ಅಶ್ಲೀಲ ಪದಳಿಂದ ನಿಂದಿಸಿದ್ದಾನೆ.
ಇದರಿಂದ ಬೇಸತ್ತ ಲೇಡಿ ಪಿಎಸ್‍ಐ ವಿದ್ಯಾರಣ್ಯಪುರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ಪ್ರಕರಣ ದಾಖಲಿಸಿಕೊಂಡಿದ್ದ ಪೊಲೀಸರು ಆರೋಪಿ ಮಂಜುನಾಥನನ್ನು ಬಂಧಿಸಿ ವಿಚಾರಣೆ ನಡೆಸಿದ್ದಾರೆ.
