ಬಾಲಿವುಡ್ ನ ಸುಪ್ರಸಿದ್ಧ ರಿಯಾಲಿಟಿ ಶೋ ರೋಡೀಸ್ ಮುಕ್ತಾಯವಾಗಿದೆ. ಈ ಬಾರಿ ಸೌತ್ ಆಫ್ರಿಕಾದಲ್ಲಿ ನಡೆದ ಈ ರಿಯಾಲಿಟಿ ಶೋನಲ್ಲಿ ಸಾಕಷ್ಟು ಸ್ಪರ್ಧಿಗಳು ಭಾಗಿಯಾಗಿದ್ದರು. ಅದರಲ್ಲೂ ಬೆಂಗಳೂರಿನ ನಂದಿನಿ ಮತ್ತು ಆಶೀಶ್ ಭಾಟಿಯಾ ಜೋಡಿ ಇಡೀ ಶೋನಲ್ಲಿ ಉತ್ತಮವಾಗಿ ಆಡಿದ್ದರು. ಅನೇಕ ಸಾಹಸಮಯ ಟಾಸ್ಕ್ ಗಳನ್ನು ಪೂರ್ಣಿಗೊಳಿಸಿದ್ದರು. ಈ ಜೋಡಿಯ ಬಗ್ಗೆ ಅಭಿಮಾನಿಗಳಿಗೆ ಎಲ್ಲಿಲ್ಲದ ನಂಬಿಕೆ ಇತ್ತು. ಕೊನೆಗೂ ಆ ನಂಬಿಕೆಯನ್ನು ಉಳಿಸಿಕೊಂಡಿದ್ದಾರೆ ಈ ಜೋಡಿ.
ಸೌತ್ ಆಫ್ರಿಕಾದ ಪ್ರಮುಖ ಸ್ಥಳಗಳಲ್ಲಿ ನಡೆದ ಸಾಹಸಮಯ ಟಾಸ್ಕ್ ಗಳನ್ನು ಆಶೀಶ್ ಮತ್ತು ನಂದಿನಿ ಸಮರ್ಥವಾಗಿಯೇ ನಿಭಾಯಿಸಿದ್ದರಿಂದ, ಇವರಿಗೆ ಗೆಲುವಿನ ಪಟ್ಟ ಸಿಗಲಿದೆ ಎಂದು ಅಂದಾಜಿಸಲಾಗಿತ್ತು. ಅದು ಈಗ ನಿಜವಾಗಿದೆ ರೋಡೀಸ್ 18 ಪಟ್ಟವನ್ನು ಆಶೀಶ್ ಭಾಟಿಯಾ ಮತ್ತು ಬೆಂಗಳೂರಿನ ನಂದಿನಿ ಅಲಂಕರಿಸಿದ್ದಾರೆ. ಇದೊಂದು ಅಡ್ವೆಂಚರ್ ರಿಯಾಲಿಟಿ ಶೋ ಆಗಿದ್ದು, ಈ ಹಿಂದೆ ಕಿರಿಕ್ ಪಾರ್ಟಿ ಖ್ಯಾತಿಯ ಸಂಯುಕ್ತ ಹೆಗ್ಡೆ ಕೂಡ ಈ ಶೋನಲ್ಲಿ ಭಾಗಿಯಾಗಿದ್ದರು. ಆದರೆ, ಅವರಿಗೆ ಗೆಲುವು ಆಗಿರಲಿಲ್ಲ. ಇದನ್ನೂ ಓದಿ:ಆಗಸ್ಟ್ ನಲ್ಲಿ ‘ಅವನೇ ಶ್ರೀಮನ್ನಾರಾಯಣ’ ನಿರ್ದೇಶಕರ ಸಿನಿಮಾ ಟೈಟಲ್ ಲಾಂಚ್ : ಶಿವರಾಜ್ ಕುಮಾರ್ ಹೀರೋ
ತಮ್ಮ ಗೆಲುವಿಗೆ ಕಾರಣವನ್ನು ಹಂಚಿಕೊಂಡಿರುವ ನಂದಿನಿ, ಈ ಶೋನಲ್ಲಿ ಅನೇಕ ಟಾಸ್ಕ್ ಗಳು ಸಾಹಸಮಯವಾಗಿದ್ದವು. ಆದರೂ, ನಾನು ಹೆದರಲಿಲ್ಲ. ಅನೇಕ ಎಲಿಮಿನೇಷನ್ ನಿಂದ ಪಾರಾದೆ, ಕಾರ್ಯಕ್ರಮದ ಆಯೋಜಕರು ನೀಡುತ್ತಿದ್ದ ತಿರುವುಗಳನ್ನು ಅರ್ಥ ಮಾಡಿಕೊಂಡು ಆಡಿದೆ. ಹಾಗಾಗಿ ಗೆಲುವು ಸಾಧ್ಯವಾಗಿದೆ ಎಂದಿದ್ದಾರೆ. ಈ ಬಾರಿ ಇಡೀ ಶೋ ಆಫ್ರಿಕಾದಲ್ಲಿ ನಡೆದಿದ್ದು, ಸೋನು ಸೂದ್ ಅವರು ಕಾರ್ಯಕ್ರಮವನ್ನು ನಡೆಸಿಕೊಟ್ಟಿದ್ದಾರೆ. ನೇಹಾ ಧೂಪಿಯಾ, ವಿಜೇಂದರ್ ಸಿಂಗ್, ನಿಖಿಲ್ ಚಿನ್ನಪ್ಪ ಸೇರಿದಂತೆ ಹಲವರು ಈ ಶೋನಲ್ಲಿ ಭಾಗಿಯಾಗಿದ್ದರು.
ಈ ಶೋ ಗೆದ್ದ ನಂದಿನಿ ಮತ್ತು ಆಶೀಶ್ ಜೋಡಿಗೆ ಒಟ್ಟು ಹತ್ತು ಲಕ್ಷ ರೂಪಾಯಿಗಳ ಬಹುಮಾನ ಸಿಕ್ಕಿದೆ. ಅಲ್ಲದೇ, ಸ್ಮಾರ್ಟ್ ಫೋನ್, ಇನ್ ಫಿನಿಕ್ಸ್ ಇನ್ ಬುಕ್ ಮತ್ತು ಅನೇಕ ಉಡುಗೆಗಳನ್ನೂ ನೀಡಲಾಗಿದೆ. ಈ ಬಾರಿ ಕರ್ನಾಟಕವನ್ನು ಇಬ್ಬರು ಪ್ರತಿನಿಧಿಸಿದ್ದು, ಬೆಂಗಳೂರಿನ ನಂದಿನಿ ಜೊತೆ ಕೊಡಗಿನ ಜಶ್ವಂತ್ ಬೋಪಣ್ಣ ಕೂಡ ಭಾಗಿಯಾಗಿದ್ದರು. ಜಶ್ವಂತ್ ಈ ಶೋನಲ್ಲಿ ರನರ್ ಅಪ್ ಆಗಿದ್ದಾರೆ.
