ಬೆಂಗಳೂರು: ದೇಶದಲ್ಲಿ ಈರುಳ್ಳಿ ಬೆಲೆ ಗಗನಕ್ಕೇರಿದೆ. ಆದರೆ ಸಿಲಿಕಾನ್ ಸಿಟಿಯಲ್ಲಿ ಅಮದು ಮಾಡಿಕೊಳ್ಳಲಾದ ಈಜಿಪ್ಟ್ ಈರುಳ್ಳಿಗೆ ಮಾತ್ರ ಡಿಮ್ಯಾಂಡ್ ಇಲ್ಲವಾಗಿದೆ.
ದೇಶದ ಇತಿಹಾಸದಲ್ಲೇ ಈರುಳ್ಳಿಯ ಬೆಲೆ ದಾಖಲೆ ಬರೆದಿದೆ. ದರ ಏರಿಕೆಯ ಮಾಸ್ಟರ್ ಸ್ಟ್ರೋಕ್ ಕೊಟ್ಟಿರುವ ಈರುಳ್ಳಿಗೆ ಫುಲ್ ಡಿಮ್ಯಾಂಡು. ಹಾಗಾಗಿ ರಾಜಧಾನಿಯಲ್ಲಿ ಈರುಳ್ಳಿ ಬೆಲೆ ಏರಿಕೆ ಕಂಡ ಹಿನ್ನೆಲೆ, ನಗರಕ್ಕೆ ಈಜಿಪ್ಟ್ ಈರುಳ್ಳಿ ಲಗ್ಗೆಯಿಟ್ಟಿದೆ. ಆದರೆ ಗ್ರಾಹಕರು ಮಾತ್ರ ಈಜಿಪ್ಟ್ ಈರುಳ್ಳಿಯನ್ನು ಖರೀದಿಸೋಕೆ ಮನಸ್ಸು ಮಾಡುತ್ತಿಲ್ಲ.
ಮಾರುಕಟ್ಟೆಯಲ್ಲಿ ಕೆಜಿಗೆ 110-120 ರೂಪಾಯಿ ಇರುವ ಈ ಈರುಳ್ಳಿಗೆ ಅಷ್ಟೇನೂ ಬೇಡಿಕೆಯಿಲ್ಲ. ಈ ಕೆಂಪು ಈರುಳ್ಳಿ, ಹೆಚ್ಚು ಘಾಟು, ನೀರಿನಾಂಶ ಹೊಂದಿದ್ದು, ಹೇಳಿಕೊಳ್ಳುವಷ್ಟು ರುಚಿನೇ ಇಲ್ಲ ಎಂದು ಗ್ರಾಹಕರು ಈಜಿಪ್ಟ್ ಈರುಳ್ಳಿಯನ್ನು ಕೊಂಡುಕೊಳ್ಳುತ್ತಿಲ್ಲ. ಹೀಗಾಗಿ ಮಾರುಕಟ್ಟೆಯಲ್ಲಿ ಬೇಡಿಕೆಯ ನಿರೀಕ್ಷೆಯನ್ನು ಈಜಿಪ್ಟ್ ಈರುಳ್ಳಿ ಹುಸಿಗೊಳಿಸಿದೆ.
ಜನ ಅಷ್ಟೇ ಅಲ್ಲದೇ ಹೊಟೇಲ್, ರೆಸ್ಟೋರೆಂಟ್ ಮಾಲೀಕರು ಕೂಡ ಈಜಿಪ್ಟ್ ಈರುಳ್ಳಿಯನ್ನು ಖರೀದಿಸಲು ಆಸಕ್ತಿ ತೋರಿಸುತ್ತಿಲ್ಲ. ಈರುಳ್ಳಿಯ ಬೇಡಿಕೆ ಕೊರತೆಯನ್ನು ನೀಗಿಸಲು ಈಜಿಪ್ಟ್ ಈರುಳ್ಳಿಯನ್ನ ಅಮದು ಮಾಡಿಕೊಂಡರು ಕೂಡ ದೇಸಿ ಈರುಳ್ಳಿಗೆ ಮಾತ್ರ ಬೇಡಿಕೆ ಕಮ್ಮಿಯಾಗಿಲ್ಲ.
