– ವಯಸ್ಸು ಮುಖ್ಯ ಅಲ್ಲ, ಎನರ್ಜಿ ಮುಖ್ಯ
ಬೆಂಗಳೂರು: ಸ್ಯಾಂಡಲ್‍ವುಡ್ ನ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಇಂದು 46 ನೇ ವರ್ಷಕ್ಕೆ ಕಾಲಿಟ್ಟಿದ್ದು, ತಮ್ಮ ನೆಚ್ಚಿನ ನಟನ ಹುಟ್ಟು ಹಬ್ಬವನ್ನು ಅವರ ಅಭಿಮಾನಿಗಳು ಜೆಪಿ ನಗರದ ಅವರ ನಿವಾಸದ ಮುಂದೆ ಭರ್ಜರಿಯಾಗಿ ಆಚರಣೆ ಮಾಡಿದ್ದಾರೆ.
ಈ ವೇಳೆ ಸುದ್ದಿಗಾರರೊಂದಿಗೆ ಮಾತನಾಡಿದ ಕಿಚ್ಚ, ನಾನು 29 ದಾಟೋದೆ ಇಲ್ಲ. ನನಗೆ ಯಾವಗಲೂ 29 ವರ್ಷ. ವಯಸ್ಸು ಮುಖ್ಯ ಅಲ್ಲ. ಎನರ್ಜಿ ಮೇಲೆ ಕೌಂಟ್ ಆಗತ್ತೆ. ಸ್ಟಾರ್ ಡಮ್ ಮೇಲೆ ನಾನು ಸಿನಿಮಾ ಮಾಡೋಕೆ ಆಗಲ್ಲ. ಎಲ್ಲದಕ್ಕೂ ಶ್ರಮ ಇರಬೇಕು ಎಂದು ಹೇಳಿದರು.
ಇದೇ ವೇಳೆ ಸಾಮಾಜಿಕ ಜಾಲತಾಣದಲ್ಲಿ ನಡೆಯುತ್ತಿರುವ ಬೆಳವಣಿಗೆ ಬಗ್ಗೆ ಪ್ರತಿಕ್ರಿಯೆ ನೀಡಿದ ಅವರು, ಮೂರು ಕೋತಿಗಳ ಕಥೆ ಹೇಳಿದರು. ಹಿರಿಯರು ಕೆಟ್ಟದನ್ನು ಕೇಳಬಾರದು, ಮಾತನಾಡಬಾರದು, ನೋಡಬಾರದು ಎಂದು ಹೇಳಿದ್ದಾರೆ. ನಾವು ಹಾಗೆಯೇ ಇರೋಣ. ಒಳ್ಳೆಯ ಬೆಳವಣಿಗೆಗಳ ಬಗ್ಗೆ ಮಾತನಾಡೋಣ. ನಮ್ಮ ಕೆಲಸದ ಮೂಲಕ ಉತ್ತರ ಕೊಡೋಣ. ಯಾರೂ ಏನಾದರು ಹೇಳಿದರೆ ಅದು ನಮಗೆ ಹೇಳಿದರು ಎಂದು ಯಾಕೆ ಅಂದ್ಕೋಬೇಕು. ಇಲ್ಲಸಲ್ಲದ ಕಲ್ಪನೆಗಳು ಬೇಡ. ನಾಲ್ಕು ಜನರಿಗೆ ಮಾದರಿಯಾಗೋ ಕೆಲಸ ಮಾಡೋಣ ಎಂದು ಹೇಳಿದರು.
ಈ ಹಿಂದೆ ಟ್ವಿಟ್ಟರ್‍ ನಲ್ಲಿ ಚಂದ್ರನ ಕಥೆ ಹೇಳಿದ್ದ ಕಿಚ್ಚ ಸುದೀಪ್ ಹುಟ್ಟು ಹಬ್ಬದ ದಿನದದ್ದು, ಮೂರು ಕೋತಿಗಳ ಕಥೆ ಹೇಳಿ ಅಭಿಮಾನಿಗಳಿಗೆ ಒಂದು ಸಂದೇಶವನ್ನು ನೀಡಿದರು. ಇದೇ ವೇಳೆ ಪೈಲ್ವಾನ್ ಚಿತ್ರತಂಡ ಒಂದು ಹಾಡನ್ನು ರಿಲೀಸ್ ಮಾಡಿ ಸುದೀಪ್‍ಗೆ ಹುಟ್ಟುಹಬ್ಬದ ಗಿಫ್ಟ್ ನೀಡಿದೆ. ಪೈಲ್ವಾನ್ ಚಿತ್ರ ಸೆಪ್ಟೆಂಬರ್ 12ಕ್ಕೆ ದೇಶಾದ್ಯಂತ ರಿಲೀಸ್ ಆಗಲಿದ್ದು, ದೇಶದೆಲ್ಲೆಡೆ ಪೈಲ್ವಾನ್ 3000ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ರಿಲೀಸ್ ಆಗಲಿದೆ.
