ದಿಸ್ಪುರ: ತನ್ನನ್ನು ಪ್ರೀತಿಸಿ, ಬೇರೊಬ್ಬಳೊಂದಿಗೆ ಮದುವೆಯಾದ ಪ್ರೇಮಿಯನ್ನು ಯುವತಿಯೊಬ್ಬಳು ಚಾಕುವಿನಿಂದ ಇರಿದು ಹಾಡಹಗಲೇ ಕೊಲೆಗೈದಿರುವ ಘಟನೆ ಅಸ್ಸಾಂನಲ್ಲಿ ನಡೆದಿದೆ.
ಅಸ್ಸಾಂನ ಬಾರ್ ಪೇಟಾ ಜಿಲ್ಲೆಯ ನಾಗಾಂವ್‍ನ ಬಿಬಿಕೆ ಕಾಲೇಜು ಎದುರು ಈ ಘಟನೆ ನಡೆದಿದೆ. ಬಿಬಿಕೆ ಕಾಲೇಜಿನ ಪ್ರಥಮ ವರ್ಷದ ಪದವಿ ಓದುತ್ತಿದ್ದ ವಿದ್ಯಾರ್ಥಿನಿ ರುನುಮಾ ಕೊಲೆ ಮಾಡಿರುವ ಆರೋಪಿ ಎಂದು ಗುರುತಿಸಲಾಗಿದೆ. ಮೊಹಿದುಲ್ ಇಸ್ಲಾಂ ಕೊಲೆಯಾದ ದುರ್ದೈವಿ. ತನ್ನನ್ನು ಪ್ರೀತಿಸಿ, ಬೇರೆ ಹುಡುಗಿಯನ್ನು ಮದುವೆಯಾಗಿ ಮೋಸ ಮಾಡಿದ್ದಾನೆ ಎಂಬ ಕೋಪಕ್ಕೆ ಯುವತಿ ಮೊಹಿದುಲ್‍ನನ್ನು ಕೊಲೆ ಮಾಡಿದ್ದಾಳೆ.
ರುನುಮಾ, ಮೊಹಿದುಲ್ ಹಲವು ದಿನಗಳಿಂದ ಒಬ್ಬರನ್ನೊಬ್ಬರು ಪ್ರೀತಿಸುತ್ತಿದ್ದರು. ಆದರೆ ಕಳೆದ ಮೂರು ದಿನಗಳ ಹಿಂದೆ ಮೊಹಿದುಲ್ ರುನುಮಾಳನ್ನು ಬಿಟ್ಟು, ಬೇರೆ ಯುವತಿಯ ಜೊತೆ ಮದುವೆಯಾಗಿದ್ದನು. ಈ ಬಗ್ಗೆ ರುನುಮಾಗೆ ತಿಳಿದ ತಕ್ಷಣ ಆಕೆ ಕೋಪಗೊಂಡಿದ್ದಾಳೆ. ಬಳಿಕ ಪ್ಲಾನ್ ಮಾಡಿ, ಮೊಹಿದುಲ್‍ನನ್ನು ಯುವತಿ ತನ್ನ ಕಾಲೇಜಿನ ಬಳಿ ಭೇಟಿಯಾಗುವಂತೆ ಕರೆದಿದ್ದಳು.
ಅದಕ್ಕೆ ಒಪ್ಪಿ ಮೊಹಿದುಲ್, ತನ್ನ ಗೆಳೆಯರ ಜೊತೆ ಯುವತಿಯನ್ನು ಭೇಟಿಯಾಗಲು ಬಂದಿದ್ದನು. ಈ ವೇಳೆ ಇಬ್ಬರೂ ಸ್ವಲ್ಪ ಸಮಯ ಮಾತಾಡಿದ್ದಾರೆ. ನಂತರ ನಿನ್ನ ಬಳಿ ಒಂಟಿಯಾಗಿ ಮಾತಾಡಬೇಕು ಎಂದು ಮೊಹಿದುಲ್‍ನನ್ನು ಸ್ವಲ್ಪ ದೂರ ಕರೆದುಕೊಂಡು ಹೋಗಿ, ಚಾಕು ಇರಿದು ಯುವತಿ ಕೊಲೆಮಾಡಿದ್ದಾಳೆ. ಬಳಿಕ ಭಯದಿಂದ ಅಲ್ಲಿಂದ ಪರಾರಿಯಾಗಿದ್ದಾಳೆ.
ಈ ಘಟನೆ ನಡೆದ ತಕ್ಷಣ ಯುವಕನನ್ನು ಸ್ನೇಹಿತರು ಆಸ್ಪತ್ರೆಗೆ ಕರೆದೊಯ್ದರು ಯಾವುದೇ ಪ್ರಯೋಜನವಾಗಿಲ್ಲ. ಅಷ್ಟರಲ್ಲಿ ಆತ ಮೃತಪಟ್ಟಿದ್ದನು. ಸದ್ಯ ಈ ಸಂಬಂಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ಆರೋಪಿ ಯುವತಿಯನ್ನು ಬಂಧಿಸಲು ಹುಡುಕಾಟ ನಡೆಸುತ್ತಿದ್ದಾರೆ.
