ಬೆಂಗಳೂರು: ಲಿವಿಂಗ್ ರಿಲೇಷನ್‌ಶಿಪ್‌ನಲ್ಲಿದ್ದ ಯುವತಿಯೊಬ್ಬರು ಮಗುವಿಗೆ ಜನ್ಮ ನೀಡಿ ತೀವ್ರ ರಕ್ತಸ್ರಾವದಿಂದ ಸಾವಿಗೀಡಾಗಿರುವ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ.
ಛತ್ತೀಸ್‌ಘಡದ ಸಮ್ಜನಮುಖಿ ಎಂಬ ಯುವತಿ ತನ್ನ ತಾಯಿ ಜೊತೆ ಬೆಂಗಳೂರಲ್ಲಿ ವಾಸವಾಗಿದ್ದಳು. ಎಲ್‌ಎಲ್‌ಎಮ್ ಪದವಿ ಕೂಡ ಮಾಡಿದ್ದರು. ಈ ನಡುವೆ ಯುವಕನೊಬ್ಬನ ಜೊತೆ ಲಿವಿಂಗ್ ರಿಲೇಷನ್‌ಶಿಪ್‌ನಲ್ಲಿದ್ದ ಆಕೆ ಗರ್ಭಿಣಿಯಾಗಿದ್ದಳು. ತುಂಬು ಗರ್ಭಿಣಿಯಾದ ಆಕೆ ನಿನ್ನೆ ಮಗುವಿಗೆ ಜನ್ಮ ನೀಡಿ, ತೀವ್ರ ರಕ್ತಸ್ರಾವದಿಂದ ಸಾವನ್ನಪ್ಪಿದ್ದಾಳೆ.
ವೈಯಾಲಿಕಾವಲ್‌ನಲ್ಲಿ ಕಳೆದ 2 ತಿಂಗಳಿಂದ ಮೃತ ಯುವತಿ ಹಾಗೂ ಆಕೆಯ ತಾಯಿ ವಾಸವಿದ್ದರು. ಹುಡುಗನ ಜೊತೆ ಲಿವಿಂಗ್ ಟುಗೆದರ್‌ನಲ್ಲಿದ್ದದ್ದು ತಾಯಿಗೆ ಗೊತ್ತಿರಲಿಲ್ಲ. ಇಂದು ಬೆಳಗಿನ ಜಾವ 3 ಗಂಟೆಗೆ ರೂಮಿನಲ್ಲಿ ಶಬ್ದ ಬಂದಿದೆ. ಈ ವೇಳೆ ಮನೆಯಲ್ಲಿದ್ದ ಸಂಬಂಧಿ ರೂಮಿಗೆ ಹೋಗಿ ನೋಡಿದ್ದಾನೆ. ರೂಮಿನಲ್ಲಿ ಯುವತಿ ರಕ್ತಸ್ರಾವದಿಂದ ಹಾಸಿಗೆ ಮೇಲಿದ್ದಳು. ಮಗಳ ಪಕ್ಕ ತಾಯಿ ಕೂಡ ಕೂತಿದ್ದಳು. ಆಸ್ಪತ್ರೆಗೆ ಕರೆದುಕೊಂಡು ಹೋಗೋಣ ಎಂದಾಗ ಬೇಡ ಎಂದಿದ್ದಳಂತೆ ತಾಯಿ. ಸ್ವಲ್ಪ ಸಮಯದ ನಂತರ ಹೆರಿಗೆಯಾಗಿದ್ದು, ಯುವತಿ ಸಾವನ್ನಪ್ಪಿದ್ದಳು. ಸದ್ಯ ತಾಯಿ ವಿರುದ್ಧವೇ ವೈಯಾಲಿಕಾವಲ್‌ ಠಾಣೆಗೆ ಸಂಬಂಧಿ ದೂರು ನೀಡಿದ್ದಾರೆ.
ಮಗಳ ಬಗ್ಗೆ ನಿರ್ಲಕ್ಷ್ಯ ತೋರಿದ್ದರಿಂದ ಸಾವು ಎಂದು ದೂರು ನೀಡಲಾಗಿದೆ. ಸದ್ಯ ದೂರು ಪರಿಶೀಲನೆ ನಡೆಸುತ್ತಿರುವ ಪೊಲೀಸರು, ಹಸುಳೆಯನ್ನ ಮಕ್ಕಳ ಆರೈಕೆ ಕೇಂದ್ರಕ್ಕೆ ನೀಡಿದ್ದಾರೆ.
