ಬೆಳಗ್ಗೆ ಹೊಸ ಹೊಸ ರೀತಿಯ ತಿಂಡಿ ತಯಾರಿಸುವುದು ಪ್ರತಿಯೊಬ್ಬ ಗೃಹಿಣಿಯರಿಗೂ ಸವಾಲು. ಒಂದೊಳ್ಳೆ ತಿಂಡಿ ತಯಾರಿಸಬೇಕೆಂದರೆ, ಹಿಟ್ಟು, ಬೇಳೆ, ಅಕ್ಕಿಯನ್ನು ರಾತ್ರಿಯಿಡೀ ನೆನೆಸಿಡಬೇಕಾಗುತ್ತದೆ. ಆದರೆ ಫಟಾಫಟ್ ಅಂತ ಮಾಡೋ ತಿಂಡಿಗಳ ಪಟ್ಟಿಯಲ್ಲಿ ಕೆಲವೇ ಕೆಲವು ಐಟಮ್‌ಗಳಿದ್ದು, ಅದನ್ನು ತಿಂದು ಬೋರ್ ಆಗಿರಲೂ ಬಹುದು.
ಇಂದಿನ ರೆಸಿಪಿ ಪ್ರತಿಯೊಬ್ಬರೂ ಕೇವಲ ಅರ್ಧಗಂಟೆಯಲ್ಲಿ ಮಾಡಬಹುದು, ಮಾತ್ರವಲ್ಲದೇ ಅತ್ಯಂತ ಸುಲಭದ ವೆಸ್ಟರ್ನ್ ಸ್ಟೈಲ್‌ನ ಬ್ರೇಕ್‌ಫಸ್ಟ್ ಕಲಿತಂತೆಯೂ ಆಗುತ್ತದೆ.
ಬೇಕಾಗುವ ಪದಾರ್ಥಗಳು:
* ಆಲ್ ಪರ್ಪಸ್ ಫ್ಲೋರ್(ಮೈದಾ ಅಥವಾ ಗೋಧಿ) – 1 ಕಪ್
* ಸಕ್ಕರೆ – 2 ಟೀಸ್ಪೂನ್
* ಬೇಕಿಂಗ್ ಪೌಡರ್ – 2 ಟೀಸ್ಪೂನ್
* ಉಪ್ಪು – ಅರ್ಧ ಟೀಸ್ಪೂನ್
* ಹಾಲು – 1 ಕಪ್
* ಕಾಯಿಸಿದ ಬೆಣ್ಣೆ – 2 ಟೀಸ್ಪೂನ್
* ಮೊಟ್ಟೆ – 1
* ಎಣ್ಣೆ – 1 ಟೀಸ್ಪೂನ್
ಮಾಡುವ ವಿಧಾನ:
* ಆವನ್ ಅನ್ನು 200 ಡಿಗ್ರಿ ಬಿಸಿಯಾಗಲು ಬಿಡಿ.
* ಸಣ್ಣ ಪಾತ್ರೆಯಲ್ಲಿ ಹಿಟ್ಟು, ಸಕ್ಕರೆ, ಬೇಕಿಂಗ್ ಪೌಡರ್ ಹಾಗೂ ಉಪ್ಪನ್ನು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ.
* ಬಳಿಕ ಹಾಲು, ಬೆಣ್ಣೆ, ಮೊಟ್ಟೆರನ್ನು ಹಾಕಿ ಮಿಕ್ಸ್ ಮಾಡಿ. ಈ ಬಾರಿ ಅತಿಯಾಗಿ ಮಿಶ್ರಣ ಮಾಡುವುದು ಬೇಡ.
* ದೊಡ್ಡ ನಾನ್ ಸ್ಟಿಕ್ ಪ್ಯಾನ್ ಅನ್ನು ಒಲೆಯಲ್ಲಿ ಬಿಸಿ ಮಾಡಿ, ಅದಕ್ಕೆ ಸ್ವಲ್ಪ ಎಣ್ಣೆ ಹಚ್ಚಿ.
* ಅದರ ಮೇಲೆ 2-3 ಟೀಸ್ಪೂನ್ ಬ್ಯಾಟರ್(ತಯಾರಿಸಿದ ಹಿಟ್ಟು) ಹಾಕಿ, ಚಮಚದ ಹಿಂಬದಿಯಿಂದ ನಿಧಾನವಾಗಿ ಸ್ವಲ್ಪ ಹರಡಿ. ದೊಡ್ಡ ಪ್ಯಾನ್ ಆಗಿದ್ದರೆ ಒಂದು ಬಾರಿಗೆ 2-3 ಬಾರಿ ಪ್ಯಾನ್ ಕೇಕ್ ಹಾಕಲು ಸಾಧ್ಯವಾಗುತ್ತದೆ.
* 2-3 ನಿಮಿಷ ಬೆಂದ ಬಳಿಕ ತೆಳುವಾದ ಸೌಟಿನಿಂದ ಅವುಗಳನ್ನು ತಿರುವಿ ಹಾಕಿ ಹಾಗೂ ಕಂದು ಬಣ್ಣವಾಗುವವರೆಗೆ ಬೇಯಿಸಿ.
* ಅವುಗಳನ್ನು ಬೇಕಿಂಗ್ ಶೀಟ್ ಹಾಕಿರುವ ಆವನ್‌ನಲ್ಲಿ ಇಡಬಹುದಾದ ಪಾತ್ರೆಗೆ ಹಾಕಿ, ಅಲ್ಯೂಮಿನಿಯಂ ಫಾಯಿಲ್‌ನಿಂದ ಮುಚ್ಚಿ, ಆವನ್‌ನಲ್ಲಿ ಇರಿಸಿ.
* 5 ನಿಮಿಷ ಬೆಂದ ಬಳಿಕ ಬೆಚ್ಚನೆಯ ಪ್ಯಾನ್ ಕೇಕ್‌ಗಳನ್ನು ಪ್ಲೇಟ್‌ಗಳಿಗೆ ಹಾಕಿ, ಅದಕ್ಕೆ ನಿಮಗಿಷ್ಟದ ಸಿರಪ್(ಮೇಪಲ್ ಸಿರಪ್, ಬೆಣ್ಣೆ, ಶುಗರ್ ಸಿರಪ್, ಜೇನುತುಪ್ಪ, ಜಾಮ್, ಚಾಕೊಲೇಟ್ ಸಿರಪ್ ಮುಂತಾದವು) ಅನ್ನು ಹಾಕಿ ಸವಿಯಿರಿ.
