– ನೀರು ಪಾಲಾಗಿದ್ದ 13 ಜನರಲ್ಲಿ 12 ಮಂದಿ ಪಾರು
– ಇಂದು ಬೆಳಗ್ಗೆ ಬಾಲಕಿ ಶವ ಪತ್ತೆ
ಭೋಪಾಲ್: ಫೋಟೋ ಕ್ಲಿಕ್ಕಿಸುತ್ತಿದ್ದ ಬಾಲಕಿ ಜಲ ಸಮಾಧಿ ಆಗಿರೋ ಘಟನೆ ಮಧ್ಯಪ್ರದೇಶದ ಇಂದೋರ್-ಭೋಪಾಲ್ ರಸ್ತೆಯಲ್ಲಿರುವ ದೇವಾಸ್ ಕೆರೆಯಲ್ಲಿ ನಡೆದಿದೆ.
ಇಂದೋರ್ ಜಿಲ್ಲೆಯ ಸಾಂವೆರ ಗ್ರಾಮದ ಎಂಟನೇ ತರಗತಿ ಓದುತ್ತಿದ್ದ ನುಜ್ಜತ್ ಮೃತ ಬಾಲಕಿ. ಕೊರೊನಾ ಲಾಕ್‍ಡೌನ್ ಬಳಿಕ ನುಜ್ಜತ್ ಕುಟುಂಬ ಮತ್ತು ಗ್ರಾಮಸ್ಥರು ಸೇರಿದಂತೆ 13 ಜನರು ಸೋಮವಾರ ಪ್ರವಾಸಕ್ಕೆ ಬಂದಿದ್ದರು. ದೇವಾಸ್ ಕೆರೆಯ ಬಳಿಯ ಫೋಟೋ ತೆಗೆದಕೊಳ್ಳುತ್ತಿದ್ದ ಸಂದರ್ಭದಲ್ಲಿ ಈ ದುರಂತ ನಡೆದಿದೆ.
ಕೆರೆ ಬಳಿ ಫೋಟೋ ಕ್ಲಿಕ್ಕಿಸುತ್ತಿದ್ದ ಬಾಲಕಿಯ ಅತ್ತೆ ಆಯತಪ್ಪಿ ಬಿದ್ದಿದ್ದರು. ಮಹಿಳೆಯನ್ನು ರಕ್ಷಿಸಲು ಒಬ್ಬರ ನಂತರ ಒಬ್ಬರು ನೀರಿಗೆ ಇಳಿದು ಅಪಾಯ ಸಿಲುಕಿದ್ದರು. ಮಹಿಳೆಯರ ಕಿರುಚಾಟ ಕೇಳಿ ಸ್ಥಳೀಯ ಮೀನುಗಾರರು ಮತ್ತು ರೈತರು 13 ಜನರಲ್ಲಿ 12 ಮಂದಿಯನ್ನ ರಕ್ಷಿಸಿದ್ದರು. ಇಂದು ಬೆಳಗ್ಗೆ ಬಾಲಕಿಯ ಶವ ಪತ್ತೆಯಾಗಿದೆ.
