– ಇಂದೋರ್ ಮಾದರಿಯಲ್ಲಿ ಕಸ ಸಂಗ್ರಹಣೆ ಯಶಸ್ವಿ
ಬೆಂಗಳೂರು: ನಗರದ ಸ್ವಚ್ಛತೆ ಹೆಚ್ಚಿಸಿ, ಕಸ ವಿಂಗಡಣೆ ಮಾಡಲು ಬಿಬಿಎಂಪಿ ಮಾಡಿರುವ ಪ್ಲಾನ್‍ಗೆ ಭಾರೀ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದ್ದು, ಇಂದೋರ್ ಮಾದರಿ ಕಸ ಸಂಗ್ರಹಕ್ಕೆ ಫುಲ್ ರೆಸ್ಪಾನ್ಸ್ ಬರುತ್ತಿದೆ.
ನಿತ್ಯ 2 ಶಿಫ್ಟ್ ಗಳಲ್ಲಿ ಕಸ ಸಂಗ್ರಹಣೆಗೆ ಬಿಬಿಎಂಪಿ ಮುಂದಾಗಿದ್ದು, ಇದನ್ನು ಪ್ರಾಯೋಗಿಕವಾಗಿ 5 ವಾರ್ಡ್‍ಗಳಲ್ಲಿ ಜಾರಿಗೆ ತರಲಾಗಿದೆ. ರಾತ್ರಿ ಪಾಳಿಯಲ್ಲಿ ಕಸ ಸಂಗ್ರಹಣೆಗೆ ಭಾರೀ ಪ್ರತಿಕ್ರಿಯೆ ದೊರೆಯುತ್ತಿದೆ. ಜನರು ಕ್ಯೂ ನಿಂತು ಕಸ ಹಾಕುತ್ತಿದ್ದಾರೆ. ಮನೆ ಕಸ, ವಾಣಿಜ್ಯ ಕಸ ಎಂದು ಎರಡು ಬಗೆಯ ಕಸ ಸಂಗ್ರಹಣೆ ಮಾಡಲಾಗುತ್ತಿದೆ.
ಇಂದೋರ್ ಮಾದರಿಯಲ್ಲಿ ಕಸ ಸಂಗ್ರಹಣೆಗೆ ಸದ್ಯ 5 ವಾರ್ಡ್‍ಗಳ ಆಯ್ಕೆ ಮಾಡಲಾಗಿದೆ. ಈ ಪ್ರಕಾರ ಜೋಗುಪಾಳ್ಯ, ಜಕ್ಕೂರು ವಾರ್ಡ್ ಸೇರಿದಂತೆ 5 ವಾರ್ಡ್‍ಗಳಲ್ಲಿ ಕಸ ಸಂಗ್ರಹಣೆಗೆ ಜನರು ಉತ್ತಮ ರೀತಿಯಲ್ಲಿ ಸ್ಪಂದಿಸುತ್ತಿದ್ದಾರೆ.
ಈ ಕುರಿತು ಮಾತನಾಡಿದ ಬಿಬಿಎಂಪಿ ಆಯುಕ್ತ ಅನಿಲ್ ಕುಮಾರ್, ಇಂದೋರ್ ಮಾದರಿಯಲ್ಲಿ ಕಸ ಸಂಗ್ರಹಣೆಗೆ ಜನರ ಸ್ಪಂದನೆ ಹೆಚ್ಚಿದೆ. ಜತೆಗೆ ಹಸಿ, ಒಣ ಕಸ ಸಂಗ್ರಹಣೆ ಪ್ರಮಾಣವೂ ಹೆಚ್ಚಿದೆ. ಹೀಗಾಗಿ ಬಹುತೇಕ ಪ್ರಾಯೋಗಿಕ ಕಸ ಸಂಗ್ರಹಣೆ ಯಶಸ್ವಿಯಾಗಿದೆ ಎಂದು ತಿಳಿಸಿದ್ದಾರೆ.
