ದಿಸ್‍ಪುರ್: ಶಾಲೆಯ ಆವರಣ ನೀರಿನಿಂದ ಆವೃತವಾಗಿ ಮೊಣಕಾಲುದ್ದ ನೀರು ನಿಂತಿದ್ರೂ ಅದರ ಮಧ್ಯೆಯೂ ರಾಷ್ಟ್ರಧ್ವಜ ಹಾರಿಸಿ ಅದಕ್ಕೆ ಶಿಕ್ಷಕರು ಹಾಗೂ ಇಬ್ಬರು ಮಕ್ಕಳು ಸೆಲ್ಯೂಟ್ ಮಾಡುತ್ತಿರುವ ಫೋಟೋವೊಂದು ಸಾಮಾಜಿಕ ಜಾಲತಣಗಳಲ್ಲಿ ಹರಿದಾಡ್ತಿದೆ.
ಪ್ರವಾಹ ಪೀಡಿತ ಅಸ್ಸಾಂನಲ್ಲಿ ಶಿಕ್ಷಕರು ಸ್ವಾತಂತ್ರ್ಯ ದಿನವಾದ ಇಂದು ರಾಷ್ಟ್ರಧ್ವಜ ಹಾರಿಸಿ ಜನ ಗಣ ಮನ ಹಾಡೋದನ್ನ ಮಾತ್ರ ಮರೆಯಲಿಲ್ಲ. ಕಳೆದ ಕೆಲವು ವಾರಗಳಿಂದ ಭಾರೀ ಮಳೆಯ ಕಾರಣ ಅಸ್ಸಾಂನ ಬಹುತೇಕ ಭಾಗಗಳು ಜಲಾವೃತವಾಗಿವೆ. ಶಿಕ್ಷಕರು ಹಾಗೂ ಇಬ್ಬರು ಮಕ್ಕಳು ಸೇರಿದಂತೆ ಈ ಆರು ಜನ ಸ್ವಾತಂತ್ರೋತ್ಸವ ಆಚರಿಸಿದ ದಿ ನಸ್ಕಾರಾ ಲೋವರ್ ಪ್ರೈಮರಿ ಸ್ಕೂಲ್ ಆಗಸ್ಟ್ 13ರಿಂದಲೂ ಜಲಾವೃತವಾಗಿದೆ ಎಂದು ವರದಿಯಾಗಿದೆ.
ಶಾಲೆಯ ಮುಖ್ಯ ಶಿಕ್ಷಕ ತಝೀಮ್ ಸಿಕ್ದರ್ ಹಾಗೂ ಸಹೋದ್ಯೋಗಿಗಳಾದ ಸ್ರಿಪೆನ್ ರಬಾ, ಜಾಯ್‍ದೇವ್ ರಾಯ್, ಮಿಝಾನುರ್ ರೆಹ್‍ಮಾನ್ ಸೇರಿದಂತೆ ಇಬ್ಬರು ವಿದ್ಯಾರ್ಥಿಗಳಾದ ಜಿಯಾರುಲ್ ಸಲಿ ಖಾನ್ ಮತ್ತು ಹೈದರ್ ಸಲಿ ಖಾನ್ ಸ್ವಾತಂತ್ರ ದಿನಾಚರಣೆಯನ್ನ ಆಚರಿಸಿದ್ದಾರೆ.
ಸೋಮವಾರದ ಸಭೆಯಲ್ಲಿ ನಾವು ನಾಲ್ವರು ಕಾರ್ಯಕ್ರಮ ಆಯೋಜಿಸಲು ನಿರ್ಧರಿಸಿದೆವು ಎಂದು ಶಾಲೆಯ ಸಹಾಯಕ ಶಿಕ್ಷಕ ರೆಹಮಾನ್ ಹೇಳಿದ್ದಾರೆ.
ಪ್ರವಾಹದ ಕಾರಣ ನಾವು ಹೆಚ್ಚಿನದ್ದೇನೂ ಮಾಡಲಾಗಲಿಲ್ಲ. ರಾಷ್ಟ್ರಗೀತೆ ಮತ್ತು ವಂದೇ ಮಾತರಂ ಹಾಡಿದೆವು. ಚಿಕ್ಕ ಮಕ್ಕಳು ಹೆಚ್ಚು ಹೊತ್ತು ನೀರಿನಲ್ಲಿ ಇರಬಾರದು ಎಂಬ ಕಾರಣಕ್ಕೆ ಬೇಗನೆ ಕಾರ್ಯಕ್ರಮವನ್ನ ಮುಗಿಸೆದೆವು ಅಂತ ಅವರು ಹೇಳಿದ್ದಾರೆ.
