ಇಸ್ಲಾಮಾಬಾದ್: ಸೌದಿ ಅರೇಬಿಯಾದಲ್ಲಿ (Saudi Arabia) ಇರಾನಿನ (Iran) ಸೂಸೈಡ್ ಡ್ರೋನ್ ಮಾಡಿದ ಕೆಲಸವು ಸಾವಿರಾರು ಕಿಲೋಮೀಟರ್ ದೂರದಲ್ಲಿರುವ ಪಾಕಿಸ್ತಾನವನ್ನು (Pakistan) ಮಧ್ಯಪ್ರಾಚ್ಯದಲ್ಲಿ ಯುದ್ಧಕ್ಕೆ ಎಳೆಯಬಹುದು.
2025ರಲ್ಲಿ ಸೌದಿ ಅರೇಬಿಯಾದೊಂದಿಗೆ ಪಾಕಿಸ್ತಾನ ಒಪ್ಪಂದವೊಂದನ್ನು ಮಾಡಿಕೊಂಡಿತ್ತು. ಅದೇನೆಂದರೆ, ಈ ಎರಡರಲ್ಲಿ ಯಾವುದಾದರು ಒಂದು ದೇಶದ ಮೇಲೆ ದಾಳಿ ನಡೆದರೂ, ಎರಡೂ ದೇಶಗಳ ಮೇಲೆ ದಾಳಿ ಎಂದೇ ಪರಿಗಣಿಸುವುದು ಒಪ್ಪಂದವಾಗಿತ್ತು. ಈಗ ಪಾಕಿಸ್ತಾನಕ್ಕೆ ಒಪ್ಪಂದ ಪಾಲಿಸುವ ಸನ್ನಿವೇಶ ಬಂದಿದೆಯೇ ಎಂಬುದು ಪ್ರಶ್ನೆಯಾಗಿದೆ. ಇದನ್ನೂ ಓದಿ: ಇರಾನ್ನ YAK-130 ಫೈಟರ್ ಜೆಟ್ ಹೊಡೆದುರುಳಿಸಿದ ಇಸ್ರೇಲ್
ಸೌದಿ ಅರೇಬಿಯಾದೊಂದಿಗಿನ ಕಾರ್ಯತಂತ್ರದ ಪರಸ್ಪರ ರಕ್ಷಣಾ ಒಪ್ಪಂದ (SMDA) ಸಂಘಟಿತ ಪ್ರತಿದಾಳಿಗೆ ಅವಕಾಶ ನೀಡುತ್ತದೆ. ಅದು ಪರಮಾಣು ಶಸ್ತ್ರಾಸ್ತ್ರಗಳನ್ನು ಒಳಗೊಂಡಿರುತ್ತದೆಯೇ ಅಥವಾ ಇಲ್ಲವೇ ಎಂಬುದರ ಕುರಿತು ಸ್ಪಷ್ಟ ವಿವರಣೆಯಿಲ್ಲ. ಈಗ ಯುದ್ಧದಲ್ಲಿ ಭಾಗವಹಿಸುತ್ತಾ ಎಂಬ ಪ್ರಶ್ನೆಗೆ ಪಾಕಿಸ್ತಾನದ ಉತ್ತರವು ಭವಿಷ್ಯವನ್ನು ನಿರ್ಧರಿಸುತ್ತದೆ.
SMDA ಯ ಅತ್ಯಂತ ವಿವಾದಾತ್ಮಕ ಭಾಗವೆಂದರೆ, ಒಪ್ಪಂದವು ಸೌದಿ ಅರೇಬಿಯಾವನ್ನು ರಕ್ಷಿಸಲು ಪಾಕಿಸ್ತಾನಕ್ಕೆ ತನ್ನ ಪರಮಾಣು ವ್ಯವಸ್ಥೆಯನ್ನು ವಿಸ್ತರಿಸಲು ಅವಕಾಶ ಮಾಡಿಕೊಟ್ಟಿರಬಹುದೆಂಬ ಅನುಮಾನ. ಇದರ ಅರ್ಥವೇನೆಂದರೆ, ಪರಮಾಣು ಶಸ್ತ್ರಸಜ್ಜಿತ ಮುಸ್ಲಿಂ ರಾಷ್ಟ್ರವು ಗಲ್ಫ್ನ ಅತ್ಯಂತ ಶ್ರೀಮಂತ ರಾಷ್ಟ್ರದೊಂದಿಗೆ ಸಂಬಂಧ ಹೊಂದಿದೆ. ಹಾಗೆ ಮಾಡುವುದರ ಮೂಲಕ ಭೌಗೋಳಿಕ ರಾಜಕೀಯ ಸ್ಫೋಟಗಳ ಅನಿಶ್ಚಿತತೆಗೆ ತನ್ನನ್ನು ಒಡ್ಡಿಕೊಂಡಿದೆ.
2025ರ ಸೆಪ್ಟೆಂಬರ್ನಲ್ಲಿ ದೋಹಾ ಮತ್ತು ಕತಾರ್ ಮೇಲೆ ಇಸ್ರೇಲ್ ವೈಮಾನಿಕ ದಾಳಿ ನಡೆಸಿದ ನಂತರ, ರಿಯಾದ್ ತನ್ನ ರಕ್ಷಣೆಗಾಗಿ ಹೆಚ್ಚಿನ ಪಾಲುದಾರರನ್ನು ಹುಡುಕಲು ಪ್ರಾರಂಭಿಸಿತು. ಈ ನಡೆ ಗಲ್ಫ್ ಅನ್ನು ಸುರಕ್ಷಿತವಾಗಿರಿಸುವ ಅಮೆರಿಕದ ಸಾಮರ್ಥ್ಯದ ಬಗ್ಗೆ ಅನುಮಾನ ಮೂಡಿಸಿತು. ಇದನ್ನೂ ಓದಿ: ಕಳೆದ ವರ್ಷವೇ ಖಮೇನಿ ಮುಗಿಸಲು ಇಸ್ರೇಲ್ ಪ್ಲ್ಯಾನ್ – ಆಗ ಅಡ್ಡ ಬಂದಿದ್ದ ಟ್ರಂಪ್!
ಪಾಕಿಸ್ತಾನವು ಮಧ್ಯಪ್ರಾಚ್ಯದಲ್ಲಿ ಯುದ್ಧಕ್ಕೆ ಸೇರದಿರುವ ಸಾಧ್ಯತೆಯ ಬಗ್ಗೆ ವಿಶ್ಲೇಷಕರು ಹೆಚ್ಚು ಒಲವು ತೋರುತ್ತಿದ್ದಾರೆ. ಆದರೆ SMDA ಕಾರಣದಿಂದಾಗಿ ಇದು ರಾಜಕೀಯವಾಗಿ ಸೌದಿಯ ರಾಜತಾಂತ್ರಿಕ ಕ್ರಮಗಳಿಗೆ ಹೆಚ್ಚಿನ ಬಲವನ್ನು ನೀಡುತ್ತದೆ. ಸದ್ಯಕ್ಕೆ ಪಾಕಿಸ್ತಾನಿ ವಿದೇಶಾಂಗ ಸಚಿವರು ಕೇವಲ ಎಚ್ಚರಿಕೆ ನೀಡಿದ್ದಾರೆ. ತಮ್ಮ ದೇಶವು ಸೌದಿ ಅರೇಬಿಯಾ ಪರವಾಗಿ ಹೋರಾಡುತ್ತದೆ ಎಂದು ಅವರು ಇನ್ನೂ ದೃಢಪಡಿಸಿಲ್ಲ.
ಪಾಕಿಸ್ತಾನವು ಸೌದಿ ಅರೇಬಿಯಾಕ್ಕೆ ಪರಮಾಣು ರಕ್ಷಣೆಯನ್ನು ವಿಸ್ತರಿಸಿದೆ ಎಂದು ಅಧಿಕೃತವಾಗಿ ಹೇಳಿಲ್ಲ. ಪಾಕಿಸ್ತಾನವು ಮೊದಲ ಬಾರಿಗೆ ಪರಮಾಣು ರಹಿತ ಮಿತ್ರ ರಾಷ್ಟ್ರಕ್ಕೆ ಪರಮಾಣು ವ್ಯವಸ್ಥೆಯನ್ನು ಪರಿಣಾಮಕಾರಿಯಾಗಿ ವಿಸ್ತರಿಸಿದೆಯೇ ಎಂಬ ಪ್ರಶ್ನೆ ಉದ್ಭವಿಸಿದೆ.
