ದುಬೈ: ಇರಾನ್ (Iran) ದುಬೈ (Dubai) ಮೇಲೆ ಡಬಲ್ ಸ್ಟ್ರೈಕ್ ನಡೆಸಿದೆ. ದುಬೈನಲ್ಲಿರುವ ಯುಎಸ್ ಸೇನಾ ಕಟ್ಟಡ, ಆಸ್ಟ್ರೇಲಿಯಾದ ನೆಲೆಯ ಮೇಲೆ ಇರಾನ್ ದಾಳಿ ಮಾಡಿದೆ.
ಅಮೆರಿಕ-ಇರಾನ್-ಇಸ್ರೇಲ್ ಸಂಘರ್ಷವು ಗಲ್ಫ್ ಪ್ರದೇಶಕ್ಕೂ ತೀವ್ರವಾಗಿ ವ್ಯಾಪಿಸಿದೆ. ದುಬೈನಲ್ಲಿ ಅಮೆರಿಕ ಮತ್ತು ಆಸ್ಟ್ರೇಲಿಯಾದ ಪಡೆಗಳಿಗೆ ಸಂಬಂಧಿಸಿದ ಸೌಲಭ್ಯಗಳನ್ನು ಗುರಿಯಾಗಿಸಿಕೊಂಡು ದಾಳಿಗಳನ್ನು ನಡೆಸಿದೆ. ಇದನ್ನೂ ಓದಿ: ವರ್ಷಾನುಗಟ್ಟಲೆ ಟ್ರಾಫಿಕ್ ಕ್ಯಾಮೆರಾ ಹ್ಯಾಕ್, ಮೊಬೈಲ್ ನೆಟ್ವರ್ಕ್ ಟ್ರ್ಯಾಕ್ – ಖಮೇನಿ ಹತ್ಯೆಗೆ ಇಸ್ರೇಲ್ ರಣತಂತ್ರ ಹೇಗಿತ್ತು?
ದುಬೈ ಬಳಿಯ ಅಲ್ ಮಿನ್ಹಾದ್ನಲ್ಲಿರುವ ಆಸ್ಟ್ರೇಲಿಯಾದ ಮಿಲಿಟರಿ ನೆಲೆಯನ್ನು ಇರಾನ್ ಟಾರ್ಗೆಟ್ ಮಾಡಿದೆ. ಆಸ್ಟ್ರೇಲಿಯಾದ ರಕ್ಷಣಾ ಸಚಿವ ರಿಚರ್ಡ್ ಮಾರ್ಲೆಸ್ ಅವರು, ಆಸ್ಟ್ರೇಲಿಯಾದ ಸಿಬ್ಬಂದಿಯನ್ನು ನಿಯೋಜಿಸಲಾಗಿರುವ ಅಲ್ ಮಿನ್ಹಾದ್ ವಾಯುನೆಲೆಯ ಮೇಲೆ ಇರಾನಿನ ಪಡೆಗಳು ದಾಳಿ ಮಾಡಿವೆ ಎಂದು ದೃಢಪಡಿಸಿದ್ದಾರೆ.
ನಾವು ಮಧ್ಯಪ್ರಾಚ್ಯದಾದ್ಯಂತ 100 ಕ್ಕೂ ಹೆಚ್ಚು ಸಿಬ್ಬಂದಿಯನ್ನು ಹೊಂದಿದ್ದೇವೆ. ಅವರಲ್ಲಿ ಹೆಚ್ಚಿನವರು ಯುಎಇಯಲ್ಲಿದ್ದಾರೆ. ಅಲ್ಲಿ ನಾವು ಹಲವು ವರ್ಷಗಳಿಂದ ಅಲ್ ಮಿನ್ಹಾದ್ನಲ್ಲಿ ಕಾರ್ಯಾಚರಣಾ ಪ್ರಧಾನ ಕಚೇರಿಯನ್ನು ಹೊಂದಿದ್ದೇವೆ ಎಂದು ಅವರು ಕ್ಯಾನ್ಬೆರಾದಲ್ಲಿ ಸುದ್ದಿಗಾರರಿಗೆ ತಿಳಿಸಿದ್ದಾರೆ.
ಗಲ್ಫ್ ರಾಷ್ಟ್ರಗಳಲ್ಲಿ ಇರಾನ್ ನಡೆಸುತ್ತಿರುವ ನಿರಂತರ ಡ್ರೋನ್ ಮತ್ತು ಕ್ಷಿಪಣಿ ಚಟುವಟಿಕೆಗಳ ನಡುವೆಯೇ ಈ ದಾಳಿಗಳು ನಡೆದಿವೆ ಎಂದು ವರದಿಯಾಗಿದೆ. ಇವು ಅಮೆರಿಕದ ಮಿಲಿಟರಿ ಆಸ್ತಿಗಳನ್ನು ಗುರಿಯಾಗಿರಿಸಿಕೊಂಡಿವೆ ಎನ್ನಲಾಗಿದೆ. ಗಲ್ಫ್ ರಾಷ್ಟ್ರಗಳು ಪಾಶ್ಚಿಮಾತ್ಯ ಪಡೆಗಳು ಮತ್ತು ನೆಲೆಗಳನ್ನು ಹೊಂದಿವೆ. ಇದನ್ನೂ ಓದಿ: Iran Israel War | ಬ್ಯಾರಲ್ಗೆ 100 ಡಾಲರ್ ಸಮೀಪಿಸಿದ ತೈಲ ಬೆಲೆ
ಇರಾನ್ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ‘ಟ್ರೂತ್ಫುಲ್ ಪ್ರಾಮಿಸ್ 4’ ಕಾರ್ಯಾಚರಣೆಯ ಭಾಗವಾಗಿ ಅಮೆರಿಕದ ನೆಲೆಗಳು ಮತ್ತು ಸ್ವತ್ತುಗಳನ್ನು ಗುರಿಯಾಗಿಸಿಕೊಂಡಿದೆ ಎಂದು ಹೇಳಿಕೆಯಲ್ಲಿ ತಿಳಿಸಿದೆ.
ದುಬೈ ಜೊತೆಗೆ ಕತಾರ್, ಬಹ್ರೇನ್, ಜೋರ್ಡಾನ್ ಮತ್ತು ಕುವೈತ್ ಮೇಲೆಯೂ ಇರಾನ್ ದಾಳಿ ನಡೆಸಿದೆ. ಇವೆಲ್ಲವೂ ಅಮೆರಿಕದ ಮಿಲಿಟರಿ ನೆಲೆಗಳಾಗಿವೆ. ಅಮೆರಿಕವು ಮಧ್ಯಪ್ರಾಚ್ಯದಾದ್ಯಂತ ಸುಮಾರು 13 ಮಿಲಿಟರಿ ನೆಲೆಗಳನ್ನು ಹೊಂದಿದ್ದು, ಸಾಮಾನ್ಯವಾಗಿ ಅವುಗಳ ನಡುವೆ 30,000 ರಿಂದ 40,000 ಸೈನಿಕರನ್ನು ನಿಯೋಜಿಸಲಾಗುತ್ತದೆ.
