ಮ್ಯಾಂಗೋ ಫಲೂಡಾ ಸವಿದು ಚಿಲ್ ಆಗಿ

ಹೋಟೆಲ್‌ಗಳಲ್ಲಿ, ಬೀದಿ ಬದಿಯ ಅಂಗಡಿಗಳಲ್ಲಿ ಮಾಡುವ ಫಲೂಡಾಗಳು ಅದ್ಭುತ ರುಚಿಯನ್ನು ನೀಡುವುದಲ್ಲದೇ ಪದೇ ಪದೇ ತಿನ್ನಬೇಕು ಎನಿಸುತ್ತದೆ. ಆದರೆ ಬೀದಿ ಬದಿಯಲ್ಲಿ ಮಾಡುವ ಫಲೂಡಾಗಳನ್ನು ತಿನ್ನುವ ಬದಲು ಮನೆಯಲ್ಲಿಯೇ ಮಾಡಿ ತಿಂದರೆ ಆರೋಗ್ಯದ ದೃಷ್ಟಿಯಲ್ಲೂ ಉತ್ತಮವಲ್ಲದೇ ಶುಚಿರುಚಿಯಾಗಿ ಮಾಡಿಕೊಂಡು ತಿನ್ನಬಹುದು. ಇವತ್ತಿನ ನಮ್ಮ ರೆಸಿಪಿಯಲ್ಲಿ ಮ್ಯಾಂಗೋ ಫಲೂಡಾ ಯಾವ ರೀತಿ ಮಾಡುವುದು ಎಂಬುದನ್ನು ತಿಳಿಸಿಕೊಡುತ್ತೇವೆ. ಹಾಗಿದ್ರೆ ಇದನ್ನು ಯಾವ ರೀತಿ ಮಾಡುವುದು ಎಂಬುದನ್ನು ತಿಳಿದುಕೊಳ್ಳೋಣ. ಇದನ್ನೂ ಓದಿ: ಸಿಹಿ ಸಿಹಿ ನೆಲ್ಲಿಕಾಯಿ ಮುರಬ್ಬಾ ಈ ರೀತಿ ಮಾಡಿ

ಬೇಕಾಗುವ ಸಾಮಗ್ರಿಗಳು:
ಹೆಚ್ಚಿದ ಮಾವಿನ ಹಣ್ಣಿನ ತುಂಡುಗಳು – 1 ಕಪ್
ಮಾವಿನ ಹಣ್ಣಿನ ಪ್ಯೂರಿ – 1 ಕಪ್
ಸಿಹಿಯಾದ ದಪ್ಪ ಹಾಲು – 1 ಕಪ್
ತುಳಸಿ ಬೀಜಗಳು – 1 ಚಮಚ
ಫಲೂಡಾ ಸೇವ್ – 2 ಚಮಚ
ಮಾವಿನ ಹಣ್ಣಿನ ಐಸ್‌ಕ್ರೀಮ್ – ಸ್ವಲ್ಪ
ಟೂಟಿ ಫ್ರೂಟಿ – ಅಲಂಕಾರಕ್ಕಾಗಿ

ಮಾಡುವ ವಿಧಾನ:
* ಮೊದಲಿಗೆ ತುಳಸಿ ಬೀಜವನ್ನು ಒಂದು ಕಪ್‌ನಲ್ಲಿ ಹಾಕಿ ಅದಕ್ಕೆ ಸ್ವಲ್ಪ ನೀರನ್ನು ಹಾಕಿ 15ರಿಂದ 20 ನಿಮಿಷಗಳ ಕಾಲ ನೆನೆಯಲು ಬಿಡಿ.
* ಬಳಿಕ ಒಂದು ಕುಕ್ಕರ್‌ನಲ್ಲಿ ಫಲೂಡಾ ಸೇವ್ ಅನ್ನು ಬೇಯಿಸಿಕೊಂಡು ಸಿದ್ಧವಾಗಿರಿಸಿ.
* ಈಗ ಒಂದು ಗ್ಲಾಸ್‌ನಲ್ಲಿ ಮಾವಿನ ಹಣ್ಣಿನ ಪೀಸ್‌ಗಳನ್ನು ಹಾಕಿಕೊಂಡು ಅದಕ್ಕೆ 1 ಚಮಚ ನೆನೆಸಿದ ತುಳಸಿ ಬೀಜ ಹಾಗೂ 1 ಚಮಚ ಫಲೂಡಾ ಸೇವ್ ಅನ್ನು ಸೇರಿಸಿಕೊಳ್ಳಿ.
* ಬಳಿಕ ಇದಕ್ಕೆ ಸ್ವಲ್ಪ ಮಾವಿನ ಹಣ್ಣಿನ ಪ್ಯೂರಿ ಮತ್ತು ದಪ್ಪನೆಯ ಹಾಲನ್ನು ಹಾಕಿಕೊಳ್ಳಿ.
* ಅದೇ ರೀತಿ ಗ್ಲಾಸ್ ಫುಲ್ ಆಗುವವರೆಗೆ ಇದೇ ಕ್ರಮವನ್ನು ಅನುಸರಿಸಿ.
* ಕೊನೆಯಲ್ಲಿ ಅದರ ಮೇಲೆ ಒಂದು ಸ್ಕೂಪ್ ಐಸ್‌ಕ್ರೀಮ್ ಅನ್ನು ಸೇರಿಸಿಕೊಂಡು ಅದರ ಮೇಲೆ ಟೂಟಿ ಫ್ರೂಟಿ ಇಂದ ಅಲಂಕರಿಸಿಕೊಂಡು ಸರ್ವ್ ಮಾಡಿ. ಇದನ್ನೂ ಓದಿ: ಸವಿಯಿರಿ ಆರೋಗ್ಯಕರ ಬಾಳೆಹಣ್ಣಿನ ಖೀರ್