ಮುಂಬೈ: ಕಳೆದ 5 ವರ್ಷಗಳಿಂದ ಮನೆಯ ಪಕ್ಕ ವಾಸವಿರೋ ಸ್ವಯಂ ಘೋಷಿತ ಮಾಂತ್ರಿಕನೊಬ್ಬ ತನ್ನ ಮಗಳ ಮೇಲೆ ಅತ್ಯಾಚಾರವೆಸಗಿದ್ದಾನೆಂದು ಆರೋಪಿಸಿ 17 ವರ್ಷದ ಬಾಲಕಿಯ ತಾಯಿಯೊಬ್ಬರು ಇಲ್ಲಿನ ಪೋವೈ ಪೊಲೀಸ್ ಠಾಣೆಯಲ್ಲಿ ಸೋಮವಾರದಂದು ದೂರು ದಾಖಲಿಸಿದ್ದಾರೆ.
ದೂರಿನ ಪ್ರಕಾರ ಆರೋಪಿ ನಾಗೇಶ್ ಭಂಡಾರಿ ಸಂತ್ರಸ್ತ ಬಾಲಕಿಯ ಎದುರು ಪೂಜೆ ಮಾಡಲೆಂದು ಆಗಾಗ ಆಕೆಯನ್ನು ಮನೆಗೆ ಕರೆಯುತ್ತಿದ್ದ. ಬಾಲಕಿಯ ವರ್ತನೆಯಲ್ಲಿ ಕೆಲವು ಬದಲಾವಣೆಗಳು ಕಂಡುಬಂದಾಗ ಈ ವಿಷಯ ಬೆಳಕಿಗೆ ಬಂದಿದೆ. ಕಳೆದ ವಾರ ಆರೋಪಿ ಬಾಲಕಿಯನ್ನ ತನ್ನ ಮನೆಗೆ ಕರೆದಾಗ ತಾಯಿಯೂ ಹಿಂಬಾಲಿಸಿ ಹೋಗಿದ್ದಾರೆ. ಆಗ ಆರೋಪಿಯು ಬಾಲಕಿಯನ್ನ ಅಸಭ್ಯವಾಗಿ ಮುಟ್ಟುತ್ತಿದ್ದುದು ನೋಡಿದ್ದಾರೆ.
ಬಳಿಕ ಮಗಳನ್ನ ವಿಚಾರಿಸಿದಾಗ 2012 ರಿಂದಲೂ ಆಗಾಗ ಆತ ಲೈಂಗಿಕ ದೌರ್ಜನ್ಯ ನಡೆಸಿರುವುದನ್ನು ಬಾಲಕಿ ಹೇಳಿದ್ದಾಳೆ. ಹೀಗಾಗಿ ಕೂಡಲೇ ತಾಯಿ ಪೊಲೀಸರ ಬಳಿ ಹೋಗಿ ದೂರು ದಾಖಲಿಸಿದ್ದಾರೆ.
ಆರೋಪಿಯು ಈ ಕುಟುಂಬದೊಂದಿಗೆ ಸ್ನೇಹ ಬೆಳೆಸಿಕೊಂಡಿದ್ದ. ಐಪಿಸಿ ಸೆಕ್ಷನ್ 376, 323, 504, 506 ಹಾಗೂ ಪೋಕ್ಸೋ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ. ಆರೋಪಿಯನ್ನು ಇನ್ನೂ ಬಂಧಿಸಿಲ್ಲ. ಕ್ರೈಂ ಬ್ರಾಂಚ್ ಕೂಡ ಈ ಬಗ್ಗೆ ತನಿಖೆ ನಡೆಸುತ್ತಿದೆ ಎಂದು ಪೋವೈ ಪೊಲೀಸ್ ಠಾಣೆಯ ಅಧಿಕಾರಿ ಹೇಳಿದ್ದಾರೆ.
