– ಸಹೋದ್ಯೋಗಿಗಳ ಜೊತೆ ಫೋಟೋ ಕ್ಲಿಕ್ಕಿಸುವಾಗ ದುರಂತ
ತಿರುವನಂತಪುರಂ: ಚಿತ್ರೀಕರಣ ನಡೆಯುತ್ತಿದ್ದ ವೇಳೆ ಮಲಯಾಳಂ ನಟ ಪ್ರಬೀಶ್ ಚಕ್ಕಲಕ್ಕಲ್ (44) ಅವರು ಕುಸಿದು ಬಿದ್ದು ಮೃತಪಟ್ಟಿದ್ದಾರೆ.
ಕೇರಳದ ಕೊಚ್ಚಿಯಲ್ಲಿ ಈ ಘಟನೆ ನಡೆದಿದೆ. ‘ಕೊಚ್ಚಿನ್ ಕೊಲಾಜ್’ ಚಿತ್ರೀಕರಣ ನಡೆಯುತ್ತಿದ್ದಾಗ ನಟ ಪ್ರಬೀಶ್ ಇದ್ದಕ್ಕಿದ್ದಂತೆ ಸೆಟ್‍ನಲ್ಲೇ ಕುಸಿದು ಬಿದ್ದಿದ್ದಾರೆ. ತಕ್ಷಣ ಅವರನ್ನು ಹತ್ತಿರದ ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ದಾಖಲಿಸಿದ್ದಾರೆ. ಆದರೆ ಆಸ್ಪತ್ರೆಗೆ ಹೋಗುವ ಮೊದಲೆ ನಟ ಕೊನೆಯುಸಿರೆಳೆದಿದ್ದರು.
ಚಿತ್ರತಂಡ ಕೇರಳದಲ್ಲಿ ತ್ಯಾಜ್ಯ ನಿರ್ವಹಣೆ ಕುರಿತು ಜಾಗೃತಿ ಮೂಡಿಸುವ ಸಿನಿಮಾವನ್ನು ಚಿತ್ರೀಕರಣ ಮಾಡುತ್ತಿತ್ತು. ಕೊಚ್ಚಿಯ ಕುಂದನ್ನೂರ್ ರಸ್ತೆಯಲ್ಲಿರುವ ತ್ಯಾಜ್ಯವನ್ನು ವಿಲೇವಾರಿ ಮಾಡುವ ಘಟಕದಲ್ಲಿ ಚಿತ್ರೀಕರಣ ಮಾಡಲಾಗಿದೆ. ಈ ಸಿನಿಮಾದಲ್ಲಿ ಪ್ರಬೀಶ್ ವಿದೇಶಿಗನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಚಿತ್ರೀಕರಣ ಸೆಟ್‍ನಲ್ಲಿ ನಟ ಪ್ರಬೀಶ್ ಭಾಗದ ಶೂಟಿಂಗ್ ಮುಗಿದಿತ್ತು. ನಂತರ ಅವರು ಸಹೋದ್ಯೋಗಿಗಳೊಂದಿಗೆ ಫೋಟೋ ಕ್ಲಿಕ್ಕಿಸಿಕೊಳ್ಳುತ್ತಿದ್ದರು. ಈ ವೇಳೆ ಇದ್ದಕ್ಕಿದ್ದಂತೆ ಕುಸಿದು ಬಿದ್ದಿದ್ದಾರೆ. ಕುಸಿದು ಬೀಳುವ ಕೆಲ ನಿಮಿಷಗಳ ಹಿಂದೆ ತನ್ನ ನಾಲಿಗೆ ಒಣಗುತ್ತಿದೆ. ಕುಡಿಯಲು ನೀರು ಕೊಡಿ ಎಂದು ವಿಡಿಯೋಗ್ರಾಫರನ್ನು ಕೇಳಿದ್ದರು. ಅಲ್ಲದೇ ಕುಸಿದು ಬೀಳುವ ಮೊದಲು ಪ್ರಬೀಶ್ ನೀರು ಸಹ ಕುಡಿದಿದ್ದಾರೆ ಎಂದು ಸೆಟ್‍ನಲ್ಲಿ ನಡೆದ ಘಟನೆಯ ಬಗ್ಗೆ ಸಹ ಕಲಾವಿದರು ಹೇಳಿದ್ದಾರೆ.
ಪ್ರಬೀಶ್ ಅನೇಕ ಟೆಲಿಫಿಲ್ಮ್ ಗಳಲ್ಲಿ ಕೆಲಸ ಮಾಡುವ ಮೂಲಕ ಗುರುತಿಸಿಕೊಂಡಿದ್ದರು. ಅಲ್ಲದೇ ಅನೇಕ ಮಲಯಾಳಂ ಚಿತ್ರಗಳಲ್ಲಿ ಡಬ್ಬಿಂಗ್ ಕಲಾವಿದರಾಗಿ ಕೆಲಸ ಮಾಡಿದ್ದರು. ಪ್ರಬೀಶ್ ತಂದೆ ಜೋಸೆಫ್, ಪತ್ನಿ ಜಾನ್ಸಿ ಮತ್ತು ಮಗಳು ತಾನಿಯಾಳನ್ನು ಅಗಲಿದ್ದಾರೆ.
