ಮಂಡ್ಯ: ಉಲ್ಟಾ ಹಾಡನ್ನು ಹಾಡುವ ಕುರಿಗಾಹಿ ಯುವಕನೊರ್ವ ಈಗ ಎಲ್ಲೆಡೆ ಜನಪ್ರಿಯಗೊಂಡಿದ್ದಾನೆ.
ಹೌದು, ಹಾಡುಗಾರಿಕೆ ಅಂದರೆ ಎಲ್ಲರಿಗೂ ಇಷ್ಟ. ಹಾಡುವುದು, ಹಾಡು ಕೇಳುವುದು ಅದೆಷ್ಟೋ ಮಂದಿಗೆ ಹವ್ಯಾಸ. ಕೆಲವರಂತು ವಿಭಿನ್ನವಾದ ಹಾಡುಗಾರಿಕೆ ಮೂಲಕ ರಂಜಿಸುತ್ತಾರೆ. ಆದರೆ ಮಂಡ್ಯದ ಒಬ್ಬ ಕುರಿಗಾಹಿಯ ಉಲ್ಟಾ ಹಾಡುಗಾರಿಕೆ ಕೇಳುಗರನ್ನು ನಿಬ್ಬೆರಗಾಗಿಸುತ್ತಿದೆ.
ಪಾಂಡವಪುರ ತಾಲೂಕಿನ ಬೇಬಿನಕುಪ್ಪೆ ಗ್ರಾಮದ ಪ್ರಕಾಶ್ ಎಂಬ ಕುರಿಗಾಹಿ ಹಾಡುವುದನ್ನು ಕೇಳಿದರೆ ಅಯ್ಯೋ ಇದ್ಯಾವ ಭಾಷೆ, ಈತ ಹಾಡುತ್ತಿರುವುದು ಕನ್ನಡ ಹಾಡುಗಳಾ? ಇಲ್ಲಾ ಬೇರೆಯಾವುದಾದರು ಭಾಷೆನಾ? ಎಂದು ಜನರಿಗೆ ಪ್ರಶ್ನೆಗಳು ಮೂಡುತ್ತದೆ. ಆದರೆ ಪ್ರಕಾಶ್ ಹಾಡುತ್ತಿರುವುದು ಅಪ್ಪಟ ಕನ್ನಡ ಹಾಡಗಳು. ಕನ್ನಡ ಹಾಡುಗಳ ಸಾಹಿತ್ಯವನ್ನ ಉಲ್ಟಾ ಹಾಡುವ ಈತ ಉಲ್ಟಾ ಸಿಂಗರ್ ಎನಿಸಿಕೊಂಡಿದ್ದಾರೆ.
ಪಿಯುಸಿವರೆಗೂ ಓದಿಕೊಂಡಿರುವ ಪ್ರಕಾಶ್ ಕುರಿಗಳನ್ನು ಮೇಯಿಸುತ್ತ ಜೀವನ ಸಾಗಿಸುತ್ತಿದ್ದಾರೆ. ಕುರಿ ಮೇಯಿಸುವ ವೇಳೆ ಸಿಗುವ ಬಿಡುವಿನ ಸಮಯದಲ್ಲಿ ಏನಾದರೂ ವಿಭಿನ್ನ ಸಾಧನೆ ಮಾಡಬೇಕೆಂದು ಆಲೋಚಿಸಿದ ಇವರು 25 ಕನ್ನಡ ಹಾಡುಗಳ ಸಾಹಿತ್ಯವನ್ನು ಉಲ್ಟಾ ಕಲಿತು ನಿರರ್ಗಳವಾಗಿ ಹಾಡುತ್ತಾರೆ.
ಅಲ್ಲದೆ ನೇರವಾಗಿ ಹಾಡುವವರನ್ನೇ ಟೀಕಿಸುವ ಜನ ಪ್ರಕಾಶ್ ಉಲ್ಟಾ ಹಾಡಿದಾಗಲು ಹಾಸ್ಯ ಮಾಡಿದ್ದರು. ಆದರೆ ಟೀಕೆಗಳ ನಡುವೆಯೂ ಪ್ರಯತ್ನ ಮುಂದುವರಿಸಿದ ಈ ಕುರಿಗಾಹಿ ಇಂದು ಹಾಡುಗಳನ್ನು ಉಲ್ಟಾ ಹಾಡುತ್ತಾ ಮಂಡ್ಯದ ಉಲ್ಟಾ ಸಿಂಗರ್ ಎಂದು ಮೆಚ್ಚುಗೆ ಗಳಿಸಿದ್ದಾರೆ. ಪ್ರಕಾಶ್ ಸಾಹಿತ್ಯದ ಬಗೆಗೂ ಆಸಕ್ತಿ ಹೊಂದಿದ್ದು ಬಿಡುವಿನ ವೇಳೆ ತಾವೇ ಬರೆದ 3 ಕವನ ಸಂಕಲನಗಳನ್ನು ಪ್ರಕಟಿಸಿದ್ದಾರೆ.
ಪ್ರಕಾಶ್‍ರ ವಿಭಿನ್ನ ಹಾಡುಗಾರಿಕೆ ಜನರ ಮೆಚ್ಚುಗೆ ಗಳಿಸಿದ್ದು, ಎಲ್ಲ ಇದ್ದೂ ಏನು ಮಾಡದವರ ನಡುವೆ ಈ ಕುರಿಗಾಹಿ ವಿಶೇಷ ಎನಿಸುತ್ತಾರೆ.
