ನವದೆಹಲಿ: ಕೊರೊನಾ ಪಾಸಿಟಿವ್ ಬಂದ ವ್ಯಕ್ತಿ ಮೂರು ತಿಂಗಳ ಬಳಿಕ ಲಸಿಕೆ ಪಡೆಯಬಹುದು ಎಂದು ಕೇಂದ್ರ ಆರೋಗ್ಯ ಇಲಾಖೆ ಹೇಳಿದೆ.
ಪಾಸಿಟಿವ್ ಬಂದ ವ್ಯಕ್ತಿಗೆ ಎಷ್ಟು ದಿನದ ಬಳಿಕ ಲಸಿಕೆ ನೀಡಬೇಕು ಎಂಬುದರ ಬಗ್ಗೆ ಹಲವು ಗೊಂದಲಗಳಿದ್ದವು. ಕೋವಿಡ್ ಲಸಿಕೆ ಹಂಚಿಕೆ ಸಂಬಂಧ ನೇಮಕವಾದ ತಜ್ಞರ ಶಿಫಾರಸಿನ ಮೇಲೆ ಸರ್ಕಾರ ಈಗ ಪಾಸಿಟಿವ್ ಬಂದ ವ್ಯಕ್ತಿ ಸೋಂಕು ಗುಣಮುಖವಾದ ಮೂರು ತಿಂಗಳ ಬಳಿಕ ಲಸಿಕೆ ಪಡೆಯಬಹುದು ಎಂದು ಹೇಳಿದೆ.
#Unite2FightCorona#LargestVaccineDrive
????If infected with COVID after 1st dose, 2nd dose to be deferred by 3 months after clinical recovery from #COVID19 illness
????COVID-19 vaccination recommended for all Lactating Women
— Ministry of Health (@MoHFW_INDIA) May 19, 2021
ಯಾವುದೇ ಲಸಿಕೆಯ ಮೊದಲ ಡೋಸ್ ಪಡೆದ ಬಳಿಕ ಕೊರೊನಾ ಪಾಸಿಟಿವ್ ಬಂದರೂ ಮೂರು ತಿಂಗಳ ಬಳಿಕ ಲಸಿಕೆ ತೆಗೆದುಕೊಳ್ಳಬೇಕು. ಇದರ ಜೊತೆಯಲ್ಲೇ ಬಾಣಂತಿಯರು ಸಹ ಕೊರೊನಾ ಲಸಿಕೆಯನ್ನು ಪಡೆಯಬಹುದು ಎಂದು ಸರ್ಕಾರ ತಿಳಿಸಿದೆ.
ಕಳೆದ ವಾರ ಕೋವಿಶೀಲ್ಡ್ ಲಸಿಕೆಯ ಎರಡನೇ ಡೋಸ್ ಪಡೆಯುವ ಅವಧಿಯನ್ನು ಸರ್ಕಾರ 12-16 ವಾರಕ್ಕೆ ವಿಸ್ತರಿಸಿತ್ತು. ಸರ್ಕಾರದ ಈ ನಿರ್ಧಾರದಿಂದ ಇನ್ನು ಮುಂದೆ ಒಂದು ಡೋಸ್ ಪಡೆದ ಬಳಿಕ 3-4 ತಿಂಗಳ ಅವಧಿಯ ಒಳಗಡೆ ಲಸಿಕೆಯನ್ನು ಪಡೆಯಬಹುದಾಗಿದೆ.
ಕೋವಿಡ್ ಲಸಿಕೆ ವಿತರಣೆಗೆ ಸಂಬಂಧಿಸಿದಂತೆ ನೇಮಕಗೊಂಡ ತಜ್ಞರು ನೀಡಿದ ಶಿಫಾರಸಿನ ಹಿನ್ನೆಲೆಯಲ್ಲಿ ಸರ್ಕಾರ ಈ ನಿರ್ಧಾರ ತೆಗೆದುಕೊಂಡಿತ್ತು. ಭಾರತ್ ಬಯೋಟೆಕ್ ಅಭಿವೃದ್ಧಿ ಪಡಿಸಿರುವ ಕೊವಾಕ್ಸಿನ್ ಲಸಿಕೆಯ ಎರಡನೇ ಡೋಸ್ ಅವಧಿ ವಿಸ್ತರಣೆಯಾಗಿಲ್ಲ. ಈಗ ಇರುವಂತೆ 4-6 ವಾರಗಳ ಒಳಗೆ 2ನೇ ಡೋಸ್ ಪಡೆಯಬಹುದಾಗಿದೆ.
ಈಗಾಗಲೇ ಕೆನಡಾ ಸೇರಿದಂತೆ ಯುರೋಪ್ ಹಲವು ರಾಷ್ಟ್ರಗಳು ಕೋವಿಶೀಲ್ಡ್ ಲಸಿಕೆಯ ಎರಡನೇ ಡೋಸ್ ಅವಧಿಯನ್ನು 12-16 ವಾರಗಳಿಗೆ ವಿಸ್ತರಿಸಿದೆ. ಈ ಹಿಂದೆ 6-8 ವಾರಗಳ ಒಳಗಡೆ ಎರಡನೇ ಡೋಸ್ ಪಡೆಯಬೇಕು ಎಂದು ಕೇಂದ್ರ ಆರೋಗ್ಯ ಇಲಾಖೆ ಹೇಳಿತ್ತು. ಎರಡನೇ ಡೋಸ್ ಲಸಿಕೆ ದಿನಾಂಕ ವಿಸ್ತರಣೆಯಾದ ಬಳಿಕ ದೇಹದ ಒಳಗಡೆ ಪ್ರತಿಕಾಯ(ಆಂಟಿಬಾಡಿ) ಜಾಸ್ತಿ ವೃದ್ಧಿಯಾಗುತ್ತಿರುವುದು ಅಧ್ಯಯನದಲ್ಲಿ ಕಂಡು ಬಂದ ಹಿನ್ನೆಲೆಯಲ್ಲಿ ಸರ್ಕಾರಗಳು ಎರಡನೇ ಡೋಸ್ ದಿನಾಂಕವನ್ನು ವಿಸ್ತರಣೆ ಮಾಡಿವೆ.
