– ಲಾಠಿ, ಕೋಲು ಹಿಡಿದು ಬಂದ ಜನ
ಲಕ್ನೋ: ಕೊರೊನಾ ಪರೀಕ್ಷೆಗೆ ಬಂದಿದ್ದ ವೈದ್ಯಕೀಯ ತಂಡದ ಮೇಲೆ ಗ್ರಾಮಸ್ಥರು ಹಲ್ಲೆಗೆ ಯತ್ನಿಸಿರುವ ಘಟನೆ ಉತ್ತರ ಪ್ರದೇಶದ ಬಾರಾಬಂಕಿಯಲ್ಲಿ ನಡೆದಿದೆ. ಗ್ರಾಮಸ್ಥರು ಲಾಠಿ ಮತ್ತು ಕೋಲುಗಳನ್ನು ಹಿಡಿದು ನಿಂತಿರುವ ವೀಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಬಾರಾಬಂಕಿಯ ಕೋಠಿ ಠಾಣಾ ವ್ಯಾಪ್ತಿಯ ರೇವತಿಪುರ್ವಾ ಗ್ರಾಮಸ್ಥರು ಹಲ್ಲೆಗೆ ಯತ್ನಿಸಿದ್ದಾರೆ. ಗ್ರಾಮದ ಪಡಿತರ ಅಂಗಡಿ ಬಳಿ ವೈದ್ಯಕೀಯ ಸಿಬ್ಬಂದಿ ಕ್ಯಾಂಪ್ ಹಾಕಿದ್ದರು. ಪಡಿತರ ಖರೀದಿಗೆ ಬರುವ ಗ್ರಾಹಕರನ್ನ ಕೊರೊನಾ ಪರೀಕ್ಷಗೆ ಒಳಪಡಿಸಿದ್ದರು. ಕೆಲ ಗ್ರಾಮಸ್ಥರು ಪರೀಕ್ಷೆ ಸಹ ಮಾಡಿಸಿಕೊಂಡಿದ್ದರು.
ಬಹುತೇಕರು ಪರೀಕ್ಷಗೆ ಹಿಂದೇಟು ಹಾಕುತ್ತಿದ್ದಂತೆ ಅಂಗಡಿಯವ ಕೊರೊನಾ ಪರೀಕ್ಷಗೆ ಒಳಗಾದ್ರೆ ಮಾತ್ರ ಪಡಿತರ ನೀಡುವುದಾಗಿ ಹೇಳಿದ್ದಾನೆ. ಇಷ್ಟು ಹೇಳುತ್ತಿದ್ದಂತೆ ಮಹಿಳೆಯರು ಮನೆಗಳಿಗೆ ವಿಷಯ ತಿಳಿಸಿದ್ದಾರೆ. ಪಡಿತರ ನೀಡದ್ದಕ್ಕೆ ಕೋಪಗೊಂಡ ಗ್ರಾಮಸ್ಥರು ಕೋಲು, ಲಾಠಿ ಹಿಡಿದು ವೈದ್ಯಕೀಯ ತಂಡದ ಮೇಲೆ ಹಲ್ಲೆಗೆ ಯತ್ನಿಸಿದ್ದಾರೆ. ಪರಿಸ್ಥಿತಿ ವಿಕೋಪಕ್ಕೆ ತಿರುಗುವ ಮುನ್ಸೂಚನೆ ಸಿಗುತ್ತಿದ್ದಂತೆ ಸಿಬ್ಬಂದಿ ಪರೀಕ್ಷೆ ಅರ್ಧಕ್ಕೆ ನಿಲ್ಲಿಸಿ ಹಿಂದಿರುಗಿದ್ದಾರೆ.
ಗ್ರಾಮಸ್ಥರು ಕೋಲು ಹಿಡಿದು ನಿಂತು ವೈದ್ಯಕೀಯ ಸಿಬ್ಬಂದಿಯನ್ನ ಬಲವಂತವಾಗಿ ಹತ್ತಿಸುತ್ತಿರೋದನ್ನ ವೀಡಿಯೋದಲ್ಲಿ ನೋಡಬಹುದಾಗಿದೆ. ಗ್ರಾಮದಿಂದ ಹಿಂದಿರುಗಿದ ವೈದ್ಯಕೀಯ ತಂಡದ ಅಧಿಕಾರಿಗಳು ಸ್ಥಳೀಯ ಕೋಠಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಅಧಿಕಾರಿಗಳ ದೂರಿನನ್ವಯ ಪ್ರಕರಣ ದಾಖಲಿ ಸಿಕೊಳ್ಳಲಾಗಿದೆ. ಐವರ ವಿರುದ್ಧ ಪ್ರಕರಣ ದಾಖಲಾಗಿದ್ದು, ಶೀಘ್ರವೇ ಆರೋಪಿಗಳನ್ನು ಬಂಧಿಸಲಾಗುವುದು ಎಂದು ಪೊಲೀಸರು ಹೇಳಿದ್ದಾರೆ.
