Connect with us

Latest

ಎರಡನೇ ಮದುವೆಗೆ ಒಪ್ಪಲಿಲ್ಲವೆಂದು ಕರೆಂಟ್ ಕಂಬ ಏರಿ ಕುಳಿತ 60ರ ತಾತ..!

Published

on

– ಮೊದಲ ಪತ್ನಿ ತೀರಿಕೊಂಡಿದ್ದು, ಐವರು ಮಕ್ಕಳಿದ್ದಾರೆ

ಜೈಪುರ: ಕುಟುಂಬಸ್ಥರು ಎರಡನೇ ಮದುವೆಗೆ ಒಪ್ಪಲ್ಲಿಲ್ಲವೆಮದು ಸಿಟ್ಟಿನಿಂದ 60 ವರ್ಷದ ವೃದ್ಧನೊಬ್ಬ 11 ಸಾವಿರ ವೋಲ್ಟೇಜ್ ಇರುವ ಕರೆಂಟ್ ಕಂಬ ಹತ್ತಿ ಕುಳಿತ ವಿಚಿತ್ರ ಘಟನೆ ನಡೆದಿದೆ. ಈ ಘಟನೆ ರಾಜಸ್ಥಾನದ ಧೋಲ್ಪುರ್ ಜಿಲ್ಲೆಯಲ್ಲಿ ನಡೆದಿದೆ.

ವೃದ್ಧ ಸೊಬ್ರಾನ್ ಗೆ ಈಗಾಗಲೇ ಮದುವೆಯಾಗಿದ್ದು, ಪತ್ನಿ ತೀರಿಕೊಂಡಿದ್ದಾರೆ. ಈ ದಂಪತಿಗೆ 5 ಮಂದಿ ಮಕ್ಕಳಿದ್ದಾರೆ. ಮೊದಲ ಪತ್ನಿ ಸಾವನ್ನಪ್ಪಿದ ಬಳಿಕ ಇದೀಗ ತಾತ ಎರಡನೇ ಮದುವೆ ಮಾಡಿಕೊಳ್ಳುವ ಇಚ್ಚೆಯನ್ನು ಕುಟುಂಬಸ್ಥರ ಮುಂದೆ ಪ್ರಸ್ತಾಪ ಮಾಡಿದ್ದಾನೆ. ಆದರೆ ಈತನ ಮಾತಿಗೆ ಮನೆಯವರು ಸೊಪ್ಪು ಹಾಕಿರಲಿಲ್ಲ.

ಮನೆಯವರು ಮದುವೆಗೆ ಒಪ್ಪದಿದ್ದರಿಂದ ನೊಂದ ವೃದ್ಧ ಕರೆಂಟ್ ಕಂಬ ಏರಿದ್ದಾನೆ. ಈ ವಿಚಾರ ತಿಳಿಯುತ್ತಿದ್ದಂತೆಯೇ ಗ್ರಾಮಸ್ಥರು ಸ್ಥಳದಲ್ಲಿ ಜಮಾಯಿಸಿದ್ದಾರೆ. ಅಲ್ಲದೆ ಕೆಳಗೆ ಇಳಿಯುವಂತೆ ಪರಿಪರಿಯಾಗಿ ಬೇಡಿಕೊಂಡಿದ್ದಾರೆ. 11 ಸಾವಿರ ವೋಲ್ಟೇಜ್ ಇರುವ ಹೈ ಟೆನ್ಶನ್ ವೈರ್ ಇದ್ದರೂ ವೃದ್ಧನ ಪುಣ್ಯಕ್ಕೆ ಆ ದಿನ ಕರೆಂಟ್ ಇರಲಿಲ್ಲ.

ಇತ್ತ ಈ ವಿಚಾರ ಪೊಲೀಸರ ಗಮನಕ್ಕೆ ಬರುತ್ತಿದ್ದಂತೆಯೇ ಕೂಡಲೇ ವೃದ್ಧನ ಮನೆಯವರಿಗೆ ಮಾಹಿತಿ ರವಾನಿಸಿದ್ದಾರೆ. ಇನ್ನೊಂದೆಡೆ ಘಟನೆ ಬಗ್ಗೆ ಮಾಹಿತಿ ಅರಿತ ವಿದ್ಯುತ್ ಇಲಾಖೆ ಆ ಪ್ರದೇಶದ ವಿದ್ಯುತ್ ಸಂಪರ್ಕವನ್ನು ಕಡಿತಗೊಳಿಸಿದೆ. ಹೀಗಾಗಿ ಭಾರೀ ಅವಘಡದಿಂದ ವೃದ್ಧ ಪಾರಾಗಿದ್ದಾನೆ. ಕುಟುಂಬ ಹಾಗೂ ನೆರೆಹೊರೆಯವರು ಪರಿಪರಿಯಾಗಿ ಬೇಡಿಕೊಂಡ ಬಳಿಕ ವೃದ್ಧ ಕರೆಂಟ್ ಕಂಬದಿಂದ ಕೆಳಗಿದನು. ಈ ವೇಳೆ ಸ್ಥಳದಲ್ಲಿದ್ದವರು ನಿಟ್ಟುಸಿರು ಬಿಟ್ಟಿದ್ದಾರೆ.

ವೃದ್ಧನ ಪತ್ನಿ 4 ವರ್ಷಗಳ ಹಿಂದೆ ಮೃತಪಟ್ಟಿದ್ದರು. ಈ ದಂಪತಿಗೆ ಮೂವರು ಗಂಡು ಹಾಗೂ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ. ಈ ಐದು ಮಂದಿ ಮಕ್ಕಳಿಗೂ ಮದುವೆ ಆಗಿದ್ದು, ಮಕ್ಕಳು ಕೂಡ ಇವೆ. ಈ ಮಧ್ಯೆ ವೃದ್ಧ ಕೆಲ ದಿನಗಳಿಂದ ತಾನು ಎರಡನೇಯ ಮದುವೆಯಾಗಬೇಕೆಂಬ ಆಸೆಯನ್ನು ಕುಟುಂಬದ ಮುಂದಿಟ್ಟಿದ್ದಾನೆ. ಆದರೆ ಮಕ್ಕಳು ಮಾತ್ರ ಇದಕ್ಕೆ ಒಪ್ಪಿರಲಿಲ್ಲ. ಇದರಿಂದ ಬೇಸರಗೊಂಡ ವೃದ್ಧ ವಿದ್ಯುತ್ ಕಂಬ ಏರಿ ಆತ್ಮಹತ್ಯೆ ಮಾಡಿಕೊಳ್ಳುವ ಬೆದರಿಕೆ ಹಾಕುವ ಮೂಲಕ ನಾಟಕವಾಡಿದ್ದಾನೆ.

Click to comment

Leave a Reply

Your email address will not be published. Required fields are marked *