14 ವರ್ಷದವನು ಈಗ ವಿಶ್ವದ ಅತೀ ಎತ್ತರದ ಬಾಲಕ!

ಬೀಜಿಂಗ್: ಚೀನಾದ 14 ವರ್ಷದ ಬಾಲಕನೊಬ್ಬ ವಿಶ್ವದ ಅತೀ ಎತ್ತರದ ಹದಿಹರೆಯದ ಪುರುಷ ಎಂಬ ದಾಖಲೆಯನ್ನು ಮಾಡಿದ್ದಾನೆ.

ರೆನ್ ಕಿಯು(14) 7 ಅಡಿ ಮತ್ತು ಮೂರು ಇಂಚು ಉದ್ದವಿದ್ದಾನೆ. ಈತ ಚೀನಾದ ಸಿಚುವಾನ್ ಪ್ರಾಂತ್ಯದ ಲೆಶನ್ ನಗರದ ಜೂನಿಯರ್ ಹೈಸ್ಕೂಲ್ ವಿಧ್ಯಾರ್ಥಿಯಾಗಿದ್ದಾನೆ. ರೆನ್ 18 ವರ್ಷ ವಯಸ್ಸಿನವರಿಗಿಂತ ಕೆಳಗಿನ ಪುರುಷರ ವಿಭಾಗದಲ್ಲಿ ಅತೀ ಎತ್ತರದ ಟೀನೇಜರ್ ಎಂಬ ಗಿನ್ನಿಸ್ ವಿಶ್ವ ದಾಖಲೆಯ ಪುಟದಲ್ಲಿ ಸೇರಿದ್ದಾನೆ.

ಗಿನ್ನಿಸ್ ದಾಖಲೆ ಬಗ್ಗೆ ರೆನ್ ಕಿಯು ಹೇಳುವುದೇನು?
ನಾನು ಶಾಲೆಗೆ ಪ್ರವೇಶಿಸಿದಾಗಿನಿಂದ ನನ್ನ ವಯಸ್ಸಿನ ಸ್ನೇಹಿತರಿಗಿಂತ ನಾನು ಎತ್ತರವಾಗಿರುವುದನ್ನು ಗಮನಿಸಿದ್ದೇನೆ. ನನ್ನ ಎತ್ತರವನ್ನು ನೋಡಿ ಹಲವರು ನನ್ನನ್ನು ದೊಡ್ಡವನು ಎಂದು ಭಾವಿಸುತ್ತಿದ್ದರು. ಇದರಿಂದ ಕೊಂಚ ಬೇಸರವಾಗುತ್ತಿತ್ತು. ಆದರೆ ಇದೇ ಎತ್ತರದಿಂದ ಏನನ್ನಾದರೂ ಸಾಧನೆ ಮಾಡಬೇಕು ಎಂದು ಆಲೋಚಿಸಿದೆ. ಆಗ ವಿಶ್ವ ದಾಖಲೆಯನ್ನು ಪಡೆಯಬಹುದೇ ಎಂದು ಪ್ರಯತ್ನಿಸಿದೆ. ಈಗ ಗಿನ್ನಿಸ್ ದಾಖಲೆ ಪಡೆದಿದ್ದೇನೆ ಎಂದು ರೆನ್ ಕಿಯು ಹೇಳಿದ್ದಾರೆ.

ವಿಶ್ವದ ಅತಿ ಎತ್ತರದ ಪುರುಷ ಹದಿಹರೆಯದವರ ದಾಖಲೆಯನ್ನು ಈ ಹಿಂದೆ ಯುಎಸ್‍ನ ಕೆವಿನ್ ಬ್ರಾಡ್‍ಫಾರ್ಡ್ ಹೊಂದಿದ್ದರು. ಆದರೆ ಕೆವಿನ್ ಗಿಂತ 5 ಸೆಂ.ಮೀ ಎತ್ತರ ಇರುವ ಮೂಲಕವಾಗಿ ಅವರ ದಾಖಲೆಯನ್ನು ಕಿಯು ಮುರಿದಿದ್ದಾರೆ.