ಡ್ರಗ್ಸ್ ನೀಡಿ ಅಸಹಜ ಲೈಂಗಿಕ ಕ್ರಿಯೆ – ವರ್ಷ ತುಂಬುದರೊಳಗೆ ಗೃಹಿಣಿ ಸೂಸೈಡ್

– 18 ಪುಟದಲ್ಲಿ ಕಾಮುಕ ಪತಿಯ ರಹಸ್ಯ
– ಪತ್ನಿಗೆ ಇಂಜೆಕ್ಷನ್ ನೀಡಿ ಪ್ರತಿನಿತ್ಯ ಸೆಕ್ಸ್ ಗೆ ಕಿರುಕುಳ

ಅಹಮದಾಬಾದ್: ಮದುವೆಯಾಗಿ ವರ್ಷ ತುಂಬುವದರೊಳಗೆ ಗೃಹಿಣಿ ವಿಷ ಸೇವಿಸಿ ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ಗುಜರಾತಿನ ಘಟ್ಲೋಡಿಯಾದಲ್ಲಿ ನಡೆದಿದೆ.

39 ವರ್ಷದ ಹರ್ಷಾ ಪಟೇಲ್ ಪತಿ ಹಾಗೂ ಆತನ ಕುಟುಂಬಸ್ಥರ ಕಿರುಕುಳಕ್ಕೆ ನೊಂದು ಆತ್ಮಹತ್ಯೆಗೆ ಶರಣಾದ ಮಹಿಳೆ. 2020 ಆಗಸ್ಟ್ 28ರಂದು ಮೂಳೆ ವೈದ್ಯನಾಗಿರುವ ಹಿತೇಂದ್ರ ಪಟೇಲ್ ಜೊತೆ ಹರ್ಷಾ ಮದುವೆಯಾಗಿದ್ದರು. ಇಬ್ಬರಿಗೂ ಇದು ಎರಡನೇ ಮದುವೆಯಾಗಿದ್ದು, ಮ್ಯಾಟ್ರಿಮೋನಿಯಲ್ ವೈಬ್‍ಸೈಟ್ ನಲ್ಲಿ ಪರಿಚಯವಾಗಿದ್ದರು.

ಮದುವೆಯಾದ ಕೆಲವೇ ದಿನಗಳಲ್ಲಿ ಹಿತೇಂದ್ರ ತಾಯಿ ಮತ್ತು ತಂದೆ ವರದಕ್ಷಿಣೆ ತರುವಂತೆ ಸೊಸೆಗೆ ಕಿರುಕುಳ ನೀಡಲಾರಂಬಿಸಿದ್ದಾರೆ. ಹಗಲು ಅತ್ತೆ-ಮಾವ ವರದಕ್ಷಿಣೆಯ ಕಿರುಕುಳ ನೀಡಿದ್ರೆ, ರಾತ್ರಿ ಸೆಕ್ಸ್ ಹೆಸರಲ್ಲಿ ಹಿತೇಂದ್ರ ಪತ್ನಿಗೆ ನರಕ ದರ್ಶನ ಮಾಡಿಸುತ್ತಿದ್ದನು. ಹಿತೇಂದ್ರ ವೈದ್ಯನಾಗಿದ್ದರಿಂದ ಮತ್ತು ಬರುವ ಔಷಧಿ, ಇಂಜೆಕ್ಷನ್ ನೀಡಿ ಅಸಹಜವಾಗಿ ವಿವಿಧ ಭಂಗಿಗಳಲ್ಲಿ ಸೆಕ್ಸ್ ನಡೆಸುತ್ತಿದ್ದನು ಎಂದು ಹರ್ಷಾ ಡೆತ್ ನೋಟ್ ನಲ್ಲಿ ಹೇಳಿದ್ದಾರೆ.

ತವರು ಮನೆ ಸೇರಿದ ಪತ್ನಿ: ಪತಿಯ ಕಿರುಕುಳದಿಂದ ನೊಂದಿದ್ದ ಹರ್ಷಾ ಡಿಸೆಂಬರ್ ನಲ್ಲಿ ತವರು ಸೇರಿದ್ದರು. ಅಂದಿನಿಂದ ತವರು ಮನೆಯಲ್ಲಿ ಉಳಿದುಕೊಂಡಿದ್ದ ಹರ್ಷಾ, ಮಂಗಳವಾರ 18 ಪುಟದ ಡೆತ್ ನೋಟ್ ಬರೆದು ವಿಷ ಸೇವಿಸಿ ಆತ್ಮಹತ್ಯೆಗೆ ಶರಣಾಗಿದ್ದಾರೆ.

ಘಟನೆ ಸಂಬಂಧ ಪತಿ ಹಿತೇಂದ್ರ, ಆತನ ತಂದೆ, ತಾಯಿ ಮತ್ತು ಸೋದರಿ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಮಾನಸಿಕ ಮತ್ತು ದೈಹಿಕ ಕಿರುಕುಳ, ಅಸಹಜ ಲೈಂಗಿಕ ಕ್ರಿಯೆ, ಡ್ರಗ್ಸ್ ಬಳಕೆ ಮತ್ತು ಆತ್ಮಹತ್ಯೆಗೆ ಪ್ರಚೋದನೆ ನೀಡಿದ ಆರೋಪದಡಿಯಲ್ಲಿ ಪ್ರಕರಣ ದಾಖಲಾಗಿದೆ.