ಚೀನಾ: 8ನೇ ಮಹಡಿಯಿಂದ ಮಹಿಳೆಯೊಬ್ಬರು ಆತ್ಮಹತ್ಯೆ ಮಾಡಿಕೊಳ್ಳಲು ಮುಂದಾಗಿದ್ದು, ಅವರನ್ನು ಅಗ್ನಿಶಾಮಕ ಸಿಬ್ಬಂದಿ ಕಾಪಾಡಿರುವ ಘಟನೆ ನಗರದಲ್ಲಿ ನಡೆದಿದೆ.
ಮಹಿಳೆಯನ್ನ ಕಾಪಾಡಿರುವ ವಿಡಿಯೋವನ್ನು ಪೇಸ್ ಬುಕ್ ಗೆ ಅಪ್ಲೋಡ್ ಮಾಡಿದ್ದು, ಈಗ ವೈರಲ್ ಆಗಿದೆ. ಈ ಘಟನೆ ಮಾರ್ಚ್ 11 ರಂದು ಚೀನಾದ ನಾನ್ಜಿಂಗ್ ನಗರದಲ್ಲಿ ನಡೆದಿದೆ. ಅಗ್ನಿಶಾಮಕ ಸಿಬ್ಬಂದಿ ಮಹಿಳೆಯನ್ನು ಕಾಪಾಡಿದ ವಿಡಿಯೋವನ್ನು ಅಪಾರ್ಟ್ ಮೆಂಟ್ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಆ ವಿಡಿಯೋವನ್ನು ಸಿಜಿಟಿಎನ್ ಫೇಸ್ ಬುಕ್ ನಲ್ಲಿ ಶೇರ್ ಮಾಡಿದೆ.
ವಿಡಿಯೋ ಪ್ರಕಾರ, ಮಹಿಳೆಯೊಬ್ಬರು 8ನೇ ಅಂತಸ್ತಿನ ಕಟ್ಟಡದ ತನ್ನ ಮನೆಯ ಕಿಟಕಿ ಮೇಲೆ ಕುಳಿತು ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಬೆದರಿಕೆ ಒಡ್ಡಿದ್ದರು. ಸ್ಥಳೀಯರು ಕೂಡಲೇ ಅಗ್ನಿಶಾಮಕ ಸಿಬ್ಬಂದಿಗೆ ಕರೆ ಮಾಡಿ ಮಾಹಿತಿ ತಿಳಿಸಿದ್ದಾರೆ. ತಕ್ಷಣ ಸ್ಥಳಕ್ಕಾಗಮಿಸಿದ ಅಗ್ನಿಶಾಮಕ ಸಿಬ್ಬಂದಿ ಆಕೆಯ ರಕ್ಷಣೆಗೆ ಕಾರ್ಯಾಚರಣೆ ಆರಂಭಿಸಿದ್ದಾರೆ.
ಕೆಲ ಸಿಬ್ಬಂದಿ ಕೆಳಗೆ ನಿಂತಿದ್ದರೆ ಓರ್ವ ಸಿಬ್ಬಂದಿ ತನ್ನ ಸೊಂಟಕ್ಕೆ ಹಗ್ಗ ಕಟ್ಟಿಕೊಂಡು ಕಟ್ಟಡದ ಮೇಲಿನ ಫ್ಲೋರಿನಿಂದ ಆಕೆಯಿದ್ದ ಫ್ಲೋರ್ ಬಳಿ ಬಂದಿದ್ದಾರೆ. ನಂತರ ಕಿಟಕಿ ಮೇಲೆ ಕುಳಿತಿದ್ದ ಮಹಿಳೆಗೆ ಕಾಲಿನಿಂದ ಒದ್ದಿದ್ದಾರೆ. ಒದ್ದ ರಭಸಕ್ಕೆ ಆಕೆ ಮನೆಯ ಒಳಗಡೆ ಬಿದ್ದಿದ್ದಾಳೆ. ಈ ಎಲ್ಲ ದೃಶ್ಯಗಳಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
https://www.youtube.com/watch?time_continue=30&v=6r3MgIExud0