Monday, 28th May 2018

ಇಂದು ಇಂಗ್ಲೆಂಡಿನಿಂದ ಹೊರಟು 7 ದೇಶಗಳನ್ನು ಸುತ್ತಿ ಚೀನಾ ತಲುಪಲಿದೆ ಈ ರೈಲು!

– 3 ತಿಂಗಳ ಹಿಂದೆ ಇಂಗ್ಲೆಂಡಿಗೆ ಬಂದಿದ್ದ ರೈಲು

ಲಂಡನ್: ಇಂಗ್ಲೆಂಡ್‍ನಿಂದ ಚೀನಾಗೆ ಮೊದಲ ಸರಕು ಸಾಗಣೆ ರೈಲು ಇಂದು ನಿರ್ಗಮಿಸಲಿದೆ. ಇಂಗ್ಲೆಂಡಿನ ಎಸ್ಸೆಕ್ಸ್‍ನಿಂದ 7500 ಮೈಲಿ(ಸುಮಾರು 12070 ಕಿ.ಮೀ) ಪ್ರಯಾಣವನ್ನು ಆರಂಭಿಸಲಿದೆ.

ಇಂಗ್ಲೆಂಡಿನ ಸ್ಟ್ಯಾನ್‍ಫರ್ಡ್ ಲಿ ಹೋಪ್‍ನ ಡಿಪಿ ವರ್ಲ್ಡ್ ಲಂಡನ್ ಗೇಟ್‍ವೇ ರೈಲ್ ಟಮಿರ್ನಲ್‍ನಿಂದ ರೈಲು ಹೊರಡಲಿದೆ. ರೈಲಿನಲ್ಲಿರುವ 30 ಕಂಟೇನರ್‍ಗಳು ವಿಸ್ಕಿ, ತಂಪು ಪಾನೀಯ, ವಿಟಮಿನ್ಸ್ ಹಾಗೂ ಔಷಧಿ ಸೇರಿದಂತೆ ಬ್ರಿಟಿಷ್ ಸರಕುಗಳನ್ನ ಹೊತ್ತು ಸಾಗಲಿದೆ.

ಚೀನಾದ ಝೀಜಿಯಾಂಗ್‍ನ ಪೂರ್ವ ಪ್ರಾಂತ್ಯದಲ್ಲಿರುವ ಪ್ರಸಿದ್ಧ ಹೋಲ್‍ಸೇಲ್ ಮಾರುಕಟ್ಟೆಯಾದ ಯಿವು ತಲುಪಲು ಈ ರೈಲು ಸುಮಾರು 12070 ಕಿ.ಮೀ ಪ್ರಯಾಣ ಮಾಡಲಿದ್ದು, 17 ದಿನಗಳ ಬಳಿಕ ಅಲ್ಲಿಗೆ ತಲುಪಲಿದೆ.

ಈ ರೈಲು 7 ದೇಶಗಳಾದ ಫ್ರಾನ್ಸ್, ಬೆಲ್ಜಿಯಂ, ಜರ್ಮನಿ, ಪೋಲ್ಯಾಂಡ್, ಬೆಲಾರಸ್, ರಷ್ಯಾ ಹಾಗೂ ಕಜಕಿಸ್ತಾನವನ್ನು ದಾಟಿ ಸಾಗಲಿದ್ದು, ಏಪ್ರಿಲ್ 27 ರಂದು ಚೀನಾ ತಲುಪಲಿದೆ. ಇನ್ನು ವಿರುದ್ಧ ದಿಕ್ಕಿನಿಂದ ಮೊದಲ ಸರಕು ಸಾಗಣೆ ರೈಲು ಚೀನಾದಿಂದ ಇಂಗ್ಲೆಂಡಿಗೆ 3 ತಿಂಗಳ ಹಿಂದೆ ಬಂದಿತ್ತು.

ವಿಮಾನಕ್ಕೆ ಹೋಲಿಸಿದ್ರೆ ರೈಲಿನ ಮೂಲಕ ಸರಕು ಸಾಗಣೆಗೆ ಕಡಿಮೆ ವೆಚ್ಛ ತಗುಲುತ್ತದೆ. ಹಾಗೆ ಸಮುದ್ರ ಮಾರ್ಗಕ್ಕಿಂತ ಕಡಿಮೆ ಸಮಯದಲ್ಲಿ ರೈಲಿನಲ್ಲಿ ಸರಕು ಸಾಗಣೆ ಮಾಡಬಹುದು ಎಂದು ರೈಲಿನ ನಿರ್ವಾಹಕರು ಹೇಳಿದ್ದಾರೆ.

Leave a Reply

Your email address will not be published. Required fields are marked *